Read Mongondow AYUB 30 Bible Online

AYUB 30 - Mongondow bible

AYUB 30

¹Táe tanaa akuoi in siningkuḻe in intau mita inta ai-aiku mita. Dungkuḷmai ki amá monia inanggapku diá patus moḷukad kon dombaku moyotakin in ungkú moḷoḷukad.

²Kon inakó in mosia tua diá in mangaḻenea popisí in diádon moropot.

³Mosia in ginogoi bo mororiga totok, dá nokaandon kon uakat inta noingkag kon kayuon inta moingongow.

⁴Mosia in norabut kon uakat in bonok mita simikayu kon ḷopá moḷoben bo kinaan pinomayá daun andeka uakatnea.

⁵Mosia in inuntun in singog moropot naonda bo intau noguntun kon mononakow.

⁶Mosia in nogutun kon bonu in angob mita; bubú mita kon dinding in buḷud nobaḻí baḷoi monia.

⁷Kon kayuon momaḷú in mosia naonda bo biag, moyosipun kon siungon in bonok inta simikayu kon kayuon.

⁸Mosia tua in diá in tangoi bo diá in boḻinea, intau mita inta ain binuntun nongkon butánea.

⁹Tanaa in namangoi in mosia bo akuoi in kinosingannea; kon i monia, akuoi in binaḻíbí monia yambá.

¹⁰Akuoi in inanggapdon monia mokooyá bo mokorongó, nodapot in pogotku dinuyáan monia.

¹¹Popisí in binaḻí i Allah in akuoi moyangkó diá kodaya, mosia in mopoaid kon inakó in yaat in gina monia.

¹²Banselang tatua nondangat kon inakó nongkon muna, bo koḷabúanku in sinomayádon monia.

¹³Mosia in noḷamboi kon bayáanku sin momutú kon inakó; diá in tobatúmai in noḷamboi[48] kon dodai in mosia nonubu.

¹⁴Naonda bo ḷunud mosia in nondangat kon dinding poḷoḷukadanku; moyotakin in mosia mamangoi mondantug kon awakku.

¹⁵Inta motoyang pinopoantug kon inakó; naonda bo tompot mogirup, pia in tangoiku noḷabú; naondadon bo goḷom noitaḻib, nobuḻidon in kobiaganku inta mopia.

¹⁶Tanaa in motoyongdon in akuoi matoi; diádon in singgaan in rorigaku.

¹⁷Aka doḷom bayongan in tuḷanku mopomporí; tumura-turak diá mooyo-oyong.

¹⁸Ki Allah in nonagang kon sigogowku dá ḷambungku in noibambé kon awakku.

¹⁹Akuoi in pinogambat-Nea kon bonu in yoná, akuoi in naonda bo yoyatan!

²⁰Akuoi in nokuani kon ini-Mu, o Allah, Iko in doí notubag; aka mosambayang in akuoi, diá pandungon-Mumai.

²¹Moraat in pinogogaid-Mu kon inakó, Iritakan-Mu in akuoi takin bayongan in ropot-Mu.

²²Pinomayá-Mu mako in tompot nopoḷayug kon inakó, kon bonu in tompot moropot pinoḷayug-Mu magí-mako in awakku.

²³Kinotaauanku, dinia-Mu in akuoi kon bonu in dunia in intau minatoi, tampat pinosipunan kon bayongan inta nobiag.

²⁴Nongonu sin Iko in nondangatbí kon intau inta nobodito, inta diá mokopongonu koḻikud in mopoigum tabi?

²⁵Akuoi naa in nongombaḷ noyotakin in intau inta kinoantugan in roriga, bo inta monotabi kon intau inta diá koonu bo onu?

²⁶Akuoi in mogoḷat mako kon pia bo bayag, táe roriga bo sindipbí in namangoi.

²⁷Akuoi in pinoguyaat in robonoḷ bo roriga; pomuḷoi in singgai kodugang-kodugang in rorigaku.

²⁸Kon bonu in sindip, diá in bayag, akuoi in moidondaḷoi; akuoi in sinimindog kon tayowon intau mobayong, mopoigum in totuḷung.

²⁹Singogku in mokayow mopoigum in tabi ná ombaḷ in ungkú in kayuon bo ḷagapan unta.

³⁰Kuḻitku in irumondí; awakku in nopokak sin pinonik in patú.

³¹Koḻipod in dinongogku in musik ḷunganga in gina, tanaa in dongkadon amui pongombaḷan.