Read Mongondow AYUB 33 Bible Online

AYUB 33 - Mongondow bible

AYUB 33

¹Tanaa, uḻe Ayub, indongogaipa kotaridion in singog mita inta potaauku naa.

²Nosadiadon naa in akuoi sin mosingog.

³Motuḻidbí in ginaku in mosingog; onu in pogumanku tua in sabanarnea.

⁴Roho i Allah in nomaḻí kon inakó, bo nobogoi in kobiagan kon inakó.

⁵Dá, aka mokotubag, tubagai in akuoi. Sadiadon in potubagmu.

⁶Sin kon i Allah, iko bo akuoi in diábí in yoposinea nongkon butá ḷamentong pinomia-Nea in kitada.

⁷Dá, dikabí in iko moondok kon inakó; deemanbí makusudku monaḷow kon inimu.

⁸Dinongogkudon onu in siningogmu, bo kinomangaḻeanku onu in makusudmu.

⁹Iko in noguman, ‘Akuoi in nodarit, diábí in aidku noiḻimpat. Diábí in nokotor bo diábí nogaid kon noitaḷá.

¹⁰Táe ki Allah in motayak kon kodoyonan moḷawang kon inakó, bo binaḻí-Nea in akuoi saturu.

¹¹Sia in notogot in rante kon sioḷku; bo umuran moindoi mako kon dodiaku.’

¹²Uḻe Ayub, noitaḷá totok in singogmu! Sin ki Allah in moḷobe-ḷoben in intau.

¹³Nongonu sin iko in moponapudbí kon i Allah kon Sia in doí mokidongog kon amui in intau?

¹⁴Ki Allah in mosingog pinongin daḷan noyagi-yagimai, tongá diá tobatúmai in intau nonondudut kon singog-Nea.

¹⁵Umpaka intau nosiug noḷoḷot kon dodai in doḷom, kon bonu in togoindop bo oontongon, ki Allah in mosingog.

¹⁶Ki Allah in nopotabá kon i monia mokidongog; sinaḻikokogan-Nea in mosia in toboḷow mita.

¹⁷Makusud-Nea sinbá mosia in mogogai mogaid kon dosa bo monaḷámai kon kaḷakuang monia.

¹⁸Diábí pinomayá-Nea mako kinoantugan in inta mokobodito; inoḻingoian-Nea in mosia nongkon kopatoian.

¹⁹Ki Allah in nonoboḷow kon intau pinongin nopoangoi in takit dá awaknea in modaitdon monakit.

²⁰Ki inta notakit doídon mongaan, umpaka kaanon inta totok in mopia táe mokototukadon.

²¹Awaknea irumutuk totok, tuḷannea mita in koontongandon komintan.

²²Sia in gogiódon mobui kon dunia mosindip dunia in intau minatoi noidiugdon kon inia.

²³Degá tobatú kon sigad in toribu in malaekat i Allah inta moponorop kon intau in oaidannea, in mamangoi sin motuḷung kon inia.

²⁴Takin tabi in malaekat tatua in moguman, ‘Buḻiaidon in sia, diábí motaau in sia moponag kon dunia in intau minatoi. Naa in doit potobut, sinbá moiḷuatdon bui in sia.’

²⁵Awaknea in mobaḻídon moropot totok mopia ná awak in tayowmobiag.

²⁶Aka mosambayang in sia, ki Allah in motabibí kon inia, dá sia in modayow kon i Allah takin ḷunganga in gina bo tompiaandon bui i Allah in kobobiagnea.

²⁷Dá kon tayowon in intau moantó sia in moguman, ‘Inta moraat inanggapku mopia, moḷobenbí in dosaku, tongá ki Allah in diábí nohukum kon inakó.’

²⁸Inimaḷowan i Allah in akuoi in mayá kon dunia in intau minatoi, dá nobiagpa in akuoi in tanaa.

²⁹Mopobui-buimai, aidan i Allah in naa komintan,

³⁰sinbá Sia in motaau moposaḷamat kon intau bo mobogoi in kopiaan kon kobiagannea.

³¹Dá indongogaidon Ayub, buká in bongoḷan kibio-biómai, akuoipa in mosingog in naa.

³²Táe aka oyúon in koibogmu singogon, yo singogdon; bo aka iko in totuu, yo ooankubí.

³³Táe aka diá, kibio-biómaidon bo indongogaipa in akuoi, akuoi in motundú kon hikmat kon inimu.