Read Mongondow AYUB 34 Bible Online

AYUB 34 - Mongondow bible

AYUB 34

¹Iko nion in mopandoi bo mobayong in akaḷ? Dá, indongogaipa in bayongan tosingogonku tanaa.

³Kotaauan in intau kon kaanon tua in mopia naonda in konanamannea, bo tosingogon moarip aka indongogannea.

⁴Pelekara tanaa in musti taridion naton bo raion naton moyotakin.

⁵Guman i Ayub, ‘Diábí in noitaḷá kon inakó, táe ki Allah in doí mobogoi kon onu in moadil kon inakó.

⁶Akuoi in inanggap nonguboḷ, sin noguman kon akuoi in diá dinosa. Tanaa in akuoi in pinaḻi-palíanmai, umpaka in akuoi diá kotaḷá.’

⁷Degá nokoimontandon in moiko nokoontong kon intau ná ki Ayub naa? Sia in mopobui-buimai in mohojat kon i Allah.

⁸Sia in moibog moyobayat in intau mita moraat bo moyotakin in intau mita mokotor.

⁹Sia in noguman, kon diábí in mangaḻenea aka sia bo moḷongasi mogaid kon ibog i Allah.

¹⁰Ei intau mita inta moarip, indongogai! Umpaka dá ki Allah Inta mokawasa totok mogaid kon moitaḷá?

¹¹Sia in mohukum kon intau podudui in aidnea, mopoaid kon inia podudui in dodianea.

¹²Ki Allah Inta Totok in mokawasa diábí mogaid kon inta moraat; bayongan in intau inogoian-Nea koadilan.

¹³Ki ine in nobogoi in kawasa kon i Allah? Ki ine in nokiḷukad in dunia naa kon i-Nia?

¹⁴Aka kuma bo ki Allah in morabut kon nyawa in intau, bo mogamá bui kon tompot kobiagannea,

¹⁵dá matoidon in bayongan mahaḷuk inta nobiag, bo intau in mobaḻí ḷobud ná inta dungkuḷ.

¹⁶Dá, aka iko moarip, taridiaibí, buká in bongoḷanmu bo indongogaidon.

¹⁷Degá ki Allah inta moadil bo inta motorindog tua in potaḷáanmu? Degá kainimukamai dá doíbí in ki Allah in moadil?

¹⁸Ki Allah in mohukum kon datu bo pongawasa aka mosia in moraat bo moromú.

¹⁹Sia in doíbí dumotá kon datu mita, andeka mopouna in intau nooyúon nongkon intau nobogá. Sin mosia komintan in Siabí in nomaḻí.

²⁰Moonggot kon doḷom, mosia in motaaubí in daḻí matoi. Ki Allah in mohukum kon pongawasa bo moyopú in mosia; Diábí in roriga-Nea in moḻimod kon intau motorindog.

²¹Sia in moindoi mako kon kobobiag in intau, inindoian-Nea in bayongan ḷampangnea.

²²Diábí in sindip, umpakabí mopungit totok, in mokobuni kon intau baradosa.

²³Diá bidon paraḷu in ki Allah monantú kon wakutunea,[50] intau in mamangoi sin adilon-Nea.

²⁴Diá bidon monaridi bo momirikisa in Sia in mopogogai kon pongawasa bo moduí kon toḻiunea.

²⁵Sin, kinotaauan-Nea onu in inaidan monia; dá dinudú-Nea bo irimumud in mosia kon dodai in doḷom.

²⁶Mosia in sinokap-Nea popisí in dosa monia, kon tayowon in intau mita ihukum-Nea in mosia.

²⁷Sin, mosia in diá dinumudui kon ibog-Nea bo diá mokidongog kon parenta-Nea mita.

²⁸Mosia in nokopopisí kon inta nobogá morogamui ombaḷ monia inindogogan i Allah.

²⁹Aka ki Allah in monantúdon kon tongá kibio-biómai, diábí tobatúmai in intau mokobaḻí mosingog kon i-Nia. Aka mogadop in Sia, diábí tobatúmai intau in mokouḻí kon i-Nia.

³⁰Dá bangusa mita in diá mokopongonu in mogimaḷow kon inta moraat mongawasa.

³¹Ayub, degá dosamu kon i Allah inakumudon? degá ain nodandi in iko kon diádon bui mogaid kon dosa?

³²Degá nopoigumdon in iko sinbá poontong-Neadon in taḷámu? Nongibotdon degá in iko kon diádon mogaid kon tua?

³³Umpaka yo indongogan i Allah onu in koibogmu, naonda in aid i Allah diá sinarimamu? Tanaa, iko in musti monantú, deemanbí akuoi. Pogumandon onu in singogonmu!

³⁴Bayongan in intau moarip notantúbí kon moibog kon tua; intau mobijak inta mokodongog kon singogku in mogumanbí

³⁵kon ki Ayub in mosingog takin diá momangaḻe, bo tosingogonnea diá in mangaḻenea.

³⁶Aka tosingogon mita i Ayub bo taridionmai, yo moniatadon kon singognea tua in naonda bo intau moraat.

³⁷Taḷánea in dinugangandon in tobatú dosa; sia in nomarontak kon i Allah, bo noningkuḻe kon i-Nia kon tayowon naton.