Read Mongondow AYUB 36 Bible Online

AYUB 36 - Mongondow bible

AYUB 36

¹Indongogaipa motoyong bui, bo posabarpa, oyúonpa doman in pogumanku podoyon kon i Allah.

³Mobayong in kinotaauanku; pakéonku intua sin moponiata kon moadil in Momomaḻíku.

⁴Tosingogonku diábí in uboḷ; intau inta totok in moarip in naa kon tayowonmu.

⁵Ki Allah tua in motorindog! Bayongan yagi-yagi kinotaauan-Nea. Diábí tobatúmai intau in inanggap-Nea nohina.

⁶Intau baradosa in diábí binió-Nea mobiag moonggot, Sia in mobogoi in moadil kon intau inta mororiga.

⁷Intau mita mojujur inindoian-Nea, binaḻí-Nea in mosia mongawasa ná datu mita, dá mosia in umuran ihoromat.

⁸Táe aka intau sinokig in rante uatoi, mororiga popisí in aidnea tontaní,

⁹dá dosa bo kaḷakuang monia in poniatadon i Allah.

¹⁰Pinoki indongogan-Nea in mosia kon tompoingat-Nea bo monaḷámai kon aid monia moraat.

¹¹Aka mosia motoindudui kon i Allah bo mosumba kon i-Nia, yo mosia in mobiag moaman bo motompia modapot in matoi.

¹²Táe aka diá mokidongog, yo matoi in mosia popisí in bodok monia.

¹³Intau inta diá kotuhan motagú kon torú; umpaka ihukum i TUHAN, doíbí in mosia moigum kon totuḷung.

¹⁴Mosia in matoi mororiga kon dodai in mobagupa, popisí in kobiagannea nopuḻing in hina.

¹⁵Ki Allah in notundú kon intau pinongin roriga, Pinaké-Nea in roriga sin mopotoingat kon inia.

¹⁶Ki Allah in nopoḷuatdon kon inimu nongkon roriga, dá iko in mokorasadon kon kopiaan, bo meja pongongaananmu in mopuḻing in kaanon.

¹⁷Táe tanaa podudui in aidmu moraat, iko in notarima kon hukumanmu.

¹⁸Mokopoingatdon, dika koakaḷan iko in doit posogó; dika poḷaḻeon in kaoyúonan.

¹⁹Diábí in mangaḻenea iko in momaḷú moigum kon totuḷung, diábí in mangaḻenea in tonaga bo ropotmu.

²⁰Dikabí monanob kon doḷom mosindip, wakutuneadon bangusa mita moyopú bo moinggamá.

²¹Pokoingat, dika mobobui kon inta moraat. Rorigamu in pinomakusud sinbá taḷaanmu in inta moraat.

²²Toropdon, ki Allah tua in totuu moḷoben in kawasa-Nea. Oyúon degá in guru ná kotoyang-Nea?

²³Ki ine in motaau monantú kon daḷan kon i-Nia andeka mokobaḻí in moguman kon Sia in nogaid kon noitaḷá?

²⁴Sia in umuran dinayow popisí in aid-Nea, bo iko in mustibí doman moduí kon i-Nia.

²⁵Bayongan intau in nokoontong kon aid-Nea, táe diá in tobatúmai in totu-totuu nonotaau kon i-Nia.[51]

²⁶Ki Allah in totuu moḷantud, diábí kotaauan in raian-Nea andeka mogiap kon kobayong in taong-Nea.

²⁷Ki Allah inta nogamá kon tubig nongkon butá binaḻí goḷom bo pinomia nobaḻí uyan inta moḷabú.

²⁸Sia in mopoḷabú in uyan nongkon goḷom; pinopobutak-Nea kon ḻimonik in intau.

²⁹Diá tobatúmai in nonotaau kon bobayá in goḷom mita bo singog in gotup kon ḷangit tampat pinogutunan i Allah.

³⁰Sinimbayagan-Nea in bayongan ḷangit pinongin kilat, táe apad in dagat tantúbí mosindip totok.

³¹Natuata in pomomiag-Nea[52] bangusa mita bo mobogoi in kaanon inta mobayong totok.

³²Sia in modomok kon kilat takin ḻima-Nea bo mopotabá monampí kon inta sinongkaná-Nea.

³³Singog in gotup nobaḻí tomponuot kon deḷang in mondangat, biag in monotaau doman kon tompot moropot moiangoi.