Read Mongondow AYUB 38 Bible Online

AYUB 38 - Mongondow bible

AYUB 38

¹Onda intua nongkon uḷu in tompot ki TUHAN in nosingog kon i Ayub, nanaa:

²“Ki ine in iko, modapot in mokobaḻí in diá mopirisaya kon hikmat-Ku pinongin tosingogonmu inta mobodok bo diá in bonunea tua?

³Tanaa, tayowaidon in Akuoi saḷaku ḷoḷaki, bo tubagai in ḷoḻibó mita tanaa.

⁴Oyúondon degá in iko kon dodai in dunia naa inaidan-Ku? Aka totuu kon mopandoi in iko, potaaudon!

⁵Ki ine in nonantú kon koḷoben in dunia? Ki ine in nogukur kon tua? Kotaauanmu degá in potubag kon tua?

⁶Naonda degá in oigi mita[53] pinotumbok kon dunia pinosindog noroton? Ki ine in nogukat kon batu uḷuan in dunia inta moroton totok,

⁷kon tungkuḷ in tundi mita in doḷo-doḷom nodondong noyotakin bo mahaḷuk mita in soroga[54] moronggoḷokap takin pia in gina.

⁸Ki ine in noḻingkop kon ngara sin modimpot kon baḷangon[55] kon dodai in nongkon bonu in gantog in butá iḻumuai in tubignea?

⁹Akuoibí in nopogoḻiung in goḷom kon dagat bo binakutnea in sindip.

¹⁰Akuoi in nonantú kon sigad in baḷangon bo ḷoḻingkop in podimpot-Ku.

¹¹Guman-Ku kon inia, ‘Naa in sigadnea. Dika taḻibanmu! Kon naa in pogogaian in bokoḷmu mita inta moḷoben.’

¹²Ei Ayub, degá nokoimontandon iko, in nogoiní kon modiug mobayag mamangoi?

¹³Nokoimontandon degá in iko in nopotabá kon doḷo-doḷom nokadai kon butá bo noponopir in intau moraat nongkon tampat pinogadopan monia?

¹⁴Bayag in singgai noposimantagmai in buḷud bo ḷopá naonda bo toimpaḷot kon butá ḷamentong bo pinongopían kon jubah tobatú.

¹⁵Bayag in singgai moiḻiu in bayag kon intau inta diá kotuhan, bo nonahang kon i monia mogaid kon inta moraat.

¹⁶Nokoimontandon degá in iko in noponag kon anor in dagat, noyayú nongkon apadnea? Nokoimontandon degá in iko in minaya-mayá kon taḷog in baḷangon?

¹⁷Nokoimontandon degá in intau nopoontong kon inimu in ḷoḷuang kon tayowon in dunia in intau minatoi inta sindip totok?

¹⁸Degá koukuranmu in kooḷad in dunia? Tubagaika aka kotaauanmu intua.

¹⁹Kinotaauanmu degá mongo nongkon onda in bayag, bo koondabí in pangkoi in sindip?

²⁰Motaau degá in iko in monantú kon sigad in sindip bo bayag? andeka mokipobui kon i monia naonda in namangoi?

²¹Tantú kotubaganmubí, sin nogoguyangdon in iko, bo kon tungkuḷ in dunia binaḻí, iko in oyúondon!

²²Nokoimontandon degá iko in namangoi kon pototagúanku mita tampat in salju bo uyan batu,

²³inta sinagúku pakéon kon dodai in mororiga, kon tungkuḷ in moparang bo kon singgai poparangan?

²⁴Kinotaauanmu degá in tampat pomukaan in mata in singgai? andeka nongkon onda degá in tompot in pomukaan?

²⁵Ki ine in nongaḻi kon got sin bayáan in tubig in uyan morogot bo mobogoi in daḷan bayáan in gotup bo kilat?

²⁶Ki ine degá in nopoangoi in uyan kon tudu in rawang moḷoben, bo kon tudu in butá inta diá inutunan in intau?

²⁷Ki ine in nomutak kon butá inta noingkag totok tua dá bonok in monubu komintan?

²⁸Degá uyan oyúon in ki amánea inoyod? Ki ine in ki amá in tubig in oḷú mita?

²⁹Degá tubig in eis oyúon in ki inánea? Ki ine in nopononggadí kon oḷú inta notogat?

³⁰Ki ine in nogaid kon tubig nobaḻí batu, bo nopomia tudu in dagat nobaḻí notogat?

³¹Degá motaau bakutonmu in tundi mita in Kartika? andeka pinotogot kon tundi in Belantik bukáanmu?

³²Degá motaau in iko mokapit kon tundi mita pomuḷoi in semponea, bo tundi Biduk moḷoben bo mointok, tantúonmu in daḷannea?

³³Kinotaauanmu degá in hukum mita kon ḷangit? bo motaaumu degá popoaid intua kon dunia?

³⁴Degá motaau in iko mopomaḷú in parenta kon goḷom, bo mopotabá kon inia mamangoi kon inimu pongin uyan?

³⁵Bo aka iko mopotabá kon gotup mita moyodangat, degá mamangoi in mosia bo moguman, “Akuoi, Tuang!”

³⁶Nongkon onda in ḷagapan ibis[56] monotaau kon toonu in Ongkag in Nil tua moponik in tubig? Ki ine in noguman kon manuk tuḷug kon monguyan?

³⁷Ki ine in moarip inta mokoiap kon goḷom bo mopotongkob dá monguyan,

³⁸uyan inta mopotogat kon ḷobud mobaḻí mokompoḷ bo butá in moyokompit?

³⁹Mokoaḷap degá in iko kon mahaḷuk sin pokaan kon singa mita bo mopobotug kon sian i adínea mita,

⁴⁰aka mogadop in mosia kon bonu in angob andeka tumuot kon bonu in pugadnea?

⁴¹Ki ine in motuḷung kon ḷagapan kawag inta gogoyon bo inta ḷumayug magí-mako motayak kon kaanon? Ki ine doman in motuḷung aka ki adínea mita momaḷú kon i-Nakó moigum kon kaanon?