Read Mongondow AYUB 39 Bible Online

AYUB 39 - Mongondow bible

AYUB 39

¹Kinotaauanmu degá mongo toonu bembé in buḷud pinogadí i inánea? Nokoimontandon degá inontongmu in rusa ḻindong nopogadí in ki adínea?

²Kinotaauanmu degá mongo tongonu nobuḷan in kobunsitannea? Degá koiapanmu in pononggadíannea?

³Kinotaauanmu degá mongo toonu in mosia in umuḻid, bo mopononggadí kon i adínea mita?

⁴Ki adínea mita in modugang moḷoben bo moropot kon yuak in rawang; mosia in mayá bo diábí mobui mangoi kon i inánea.

⁵Ki ine in momuḻi kon keledai ḻindong kon kayuon? Ki ine in mobuká kon tontogotnea bo mopobió kon inia maya-mayá mako?

⁶Ogoiku kon inia in rawang mobaḻí baḷoinea bo padang gurun mita mobaḻí tampat pogogutunannea.

⁷Sia in iyumayú kon kotá mita bo ramenea, diábí in mokoyonok bo mopogaid kon inia.

⁸Rawang bonok kon buḷud tampat in kaanonnea, sinayaknea in bonok mita moḷunow kon tua.

⁹Degá sapi ḻindong moibog in pakéonmu mogaid? Moibog degá in sia mosiug doḷom kon ḷantungmu?

¹⁰Kotogotanmu degá in sia bo pakisaanmu momajeko? Mokopotabá degá in iko kon inia mongari kon gobámu?

¹¹Motaau degá pongatamu in ropotnea tua, bo ogoimu kon inia in oaidanmu inta mobogat?

¹²Degá pirisayaanmu in sia mosipun kon bungai in boyómu, bo modia pobayá in tampat duḷangmu?

¹³Totuu moḻikat in ḷoḷayug in ḷagapan unta! Táe diá in sia mokotongkai kon ḷoḷayug in ḷagapan bangow.

¹⁴Ḷagapan unta mononatu kon butá, bodongka taḷaannea; dá bungaiondon in momatu kon natunea.

¹⁵Diábí kinotaauannea kon dika bo koritakan in intau bo mahaḷuk mita ḻindong in moritak.

¹⁶Inanggapnea in ki adínea in deemanbí sia in kitogi; diábí pandungonnea aka onu in iḷongasinea diá in mangaḻenea.

¹⁷Akuoibí in nomaḻí kon inia bodok bo kabaḷ, diábí inogoianku in sia in hikmat bo akaḷ.

¹⁸Táe aka momangkoidon in sia moribatuk[57] moḻikat, sia in moḻika-ḻikat in kabaḷo bo tumotakoinea.

¹⁹Ei Ayub, iko degá in nobogoi in ropot kon kabaḷo bo buoknea inta suge-sugepé kon sindunnea?

²⁰Iko degá in nopotabá kon inia ḷumanduk naonda bo pangkoḷá, bo ganggornea sin mopogogondok kon intau?

²¹Sia in mongukud kon butá pia-pia mako, bo takin ibog moḷoben mayá in sia kon poparangan.

²²Diábí kotaauannea onu in urot andeka moondok; diábí in pitow inta mokopogundok kon inia.

²³Ḷoḷutam inta binaba in tumotakoinea motoninsing bo mopouḻi-uḻinag kotugatan in sindar.

²⁴Takin ibog inta tumaga-tagab moribatuk in kabaḷo tatua; aka torompet mosingog yo diá in sia mokotahang kon gina.

²⁵Sia in moganggor pomuḷoi in torompet irupon nongkon noyayú kobóannea in bó in poparangan. Dinongognea in baḷú in porwira mita kon dodai in mosia mobogoi in tompoingat.

²⁶Degá ḷagapan boniá in sinundúmu iḷumayug aka sia mopobayá in toḷatan takin koḻikip inta noibuká mako?

²⁷Parentamu degá inta dinuduian in ḷagapan boniá kon dodai in sia diápa nomia kon pugadnea kon buḷud inta moḷantud?

²⁸Kon tudu in buḷud batu sia noposindog in baḷoinea; Popod in batu inta notonggoruit binaḻínea dinding.

²⁹Nongkon tua sia in moindoi magí-mako kon bayongan tampat matanea in motarap kon onu in motaau domokon.

³⁰Kon onda in oyúon matoi, kon tua in sia, bo dugú in kokaanonnea tatua in inumon i adínea mita.