Read Mongondow AYUB 4 Bible Online

AYUB 4 - Mongondow bible

AYUB 4

¹Bo nosingogdon in ki Elipas, kainia: “Ayub, moyaat degá in ginamu aka mosingog in akuoi? Diádon mokotahang in akuoi in tongá umuran kibio-biómai.

³Nobayong in intau inta ain inogoianmu in totundú, bo mosia inta moyangkó iniropotanmudon.

⁴Tosingogonmu mita inta mopoḷoben kon gina, nopobangondon kon intau inta noipintud, noḷungkoyó bo noḷopí.

⁵Táe tanaa ikodon tontaní in kinotugatan in robonoḷ in gina; noitaḻikokog in iko, bo kinobuḻiandon in kamang.

⁶Iko nion in intau inta motoindudui kon i Allah; kobobiagmu in diábí in moraat? Aka natua, dá patusbí in iko moyakin bo diá kobuḻian in kamang.

⁷Pikirdon, nokoimontandon degá in intau inta diá kotaḷá in kinotugatan in bodito bo roriga?

⁸Kinotaauanku sin noindoi magí-mako kon intau inta mogaid kon inta diá mopia, bo moponimboi in bibit in bodito naonda bo batoḷ in pinomuḷa, yo mokoyutbí kon bodito bo roriga!

⁹Naonda bo deḷang, natuata in torú i Allah momutú kon i monia dapot in moyopú!

¹⁰Intau moraat moganggor bo mogaú, naonda bo singa mosia in moganggor. Táe pinomponan i Allah in bibig monia poḷat nomutoḷ kon ingipon mita monia.

¹¹Mosia in matoi naonda bo singa inta kinodaitan in kaanon, dá ki adínea mita in posibayádon magí-mako.

¹²Nokoimontandon in tobatú tosingogon in noiangoi kon inakó, naonda bo gombong mooyut kon bongoḷanku.

¹³Siugku in kinotuyayowannea, nádon onda bo sinumogoindop kon diá mopia kon sindip moromon.

¹⁴Dá noitaḻikokog in akuoi bo urot mako; nodait noḻiai in awakku sin ginumugur.

¹⁵Tompot moyangkó nogirup kon pogotku, dá nomukádon in poyuntungku.

¹⁶Intau tobatú sinimindog kon tayowonku; inindoianku, táe diábí kinotaauanku mongo ki ine in sia. Bo kinodongoganku in singog nonginggamá kon ingongow tatua,

¹⁷‘Degá intau in mobiag takin diá in taḷá kon tayowon i Allah?[7] Degá diá in taḷánea kon mata[8] i Inta nomaḻí kon inia?

¹⁸Nodapotbí in mogogundoi mita i Allah kon soroga, diábí motaau pirisayaan-Nea. Nodapotbí in malaekat-Nea mita kinouḻían-nea kon taḷá bo inta diá mopia.

¹⁹Apapa doman mahaḷuk nongkon butá ḷamentong mahaḷuk ḷobud inta motaau romputon naonda bo sisik!

²⁰Mahaḷuk tatua in mobiag doḷo-doḷom, bo matoi moisimayat mako kon dodai in ḷoḷabungnea, bo diá bidon in sia toro-toropon bui.

²¹Dá nobuḻidon in bayongan inta kon inia; sia in minatoi takin diá nokouḻí kon gina mopia.’