Read Mongondow AYUB 41 Bible Online

AYUB 41 - Mongondow bible

AYUB 41

¹Mokodomok degá in iko kon i bangkeḻé Lewiatan,[59] tongá momaké in kail in toyá? Kotokiganmu degá in dilánea tongá mopomaké in tontogot mita potogot?

²Mokobaḻí degá in iko mopouḷak in tontogot kon ngiungnea andeka mopokaud in kokaud uatoi kon ayoinea?

³Degá mopoigum in sia kon inimu sinbá buḻianmu? andeka moyosingogmu, mopoigum in totabi?

⁴Degá in sia mogaid kon yopakat takinmu, bo modandi kon umuran mobantung kon inimu?

⁵Degá togotonmu in sia ná motogot kon ḷagapan inta biniagmu, inta mokosanang kon bobantung mita bobay?

⁶Degá sia in potaḷui in intau mita inta mododomok kon toyá bo silaion magí-mako kon intau mita mopopotaḷui?

⁷Koturakanmu degá in kuḻitnea mopomaké in pandong toḷu in matanea andeka takuḷonmu in sia in ginubat inta moiḷambai kon uḷunea?

⁸Ḻiaidon in sia komintanpa, bo diá bidon iko moḻiai bui; poropatoian tatua in diábí koḻionganmu modapotkabí in toonu.

⁹Bayongan in intau inta mokoontong kon Lewiatan, in mobaḻíbí moḻemé bo moumpag togopuḷongon.

¹⁰Rumogi in sia aka guḷungon kon siugnea; diábí tobatúmai intau in mokobaḻí simindog kon tayowonnea.

¹¹Ki ine in mokobaḻí monayow kon inia bo diá tompaḻían? Kon dunia naa diábí in mokoaid kon natua.

¹²Igai bá oumanonku in bayongan awak in Lewiatan, pinomayá ropotnea bo batangannea inta moḷunat.

¹³Diábí tobatúmai in intau in mokoberak kon ḷambung ḷuainea andeka mokoḷambai kon ḷambung in parang[60] inta pinakénea.

¹⁴Ki ine in mokobuká kon tungginea inta moropot, inta nopuḻing in bagang mita mongoroton?

¹⁵Naonda bo kaḻeaw inta nopipid, tuata in ḻikudnea[61] noikompit nodagin, ná batu in kotogatnea.

¹⁶Moyoguntuḷ, noitogot nodagin, dá umpaka tompot diá mokotuot.

¹⁷Kaḻeaw tatua in moropot totok noyokaan dá diábí kopoyotontanían.

¹⁸Aka Lewiatan mobaan, moisangket in sindar; matanea in mopouḻi-uḻinag naonda bo pomukaan in singgai.

¹⁹Renté in tuḷú moiroput nongkon bibignea; baga in tuḷú moirosik magí-mako.

²⁰Poyok in mosipun nongkon bonu in ngiungnea, ná poyok in kayu inta pinondudub kon siup in kuyon.

²¹Poginaannea in mokodokot kon baga; dokot in tuḷú ḷumuai nongkon bibignea.

²²Sindunnea in moropot totok, dá modait moondok in kon tayowonnea.

²³Diábí in noḻemé kon kuḻitnea; diábí mokobotak sin motogat naonda bo uwaja.

²⁴Ginanea ná kotogat in batu, diábí kotaauannea in ḻia-ḻiaw in gina moroton bo motogat ná batu poḷoḻintog.

²⁵Aka simindog in sia, intau inta totok in moropot[62] in koinggamáan doman in baraninea, kinodaitan in daya popisí in moondok totok.

²⁶Diábí in pitow in mokotompaḻí kon inia; pandong, piot andeka ginubat in diábí mokonakit kon inia.

²⁷Uatoi in inanggapnea tongá ná koaḷus in bonok bo bitú in nádon korugá in kayu inta noampod.

²⁸Diábí in piot in mokountun kon inia; batu inta pinogandur kon inia tongá naonda bo wawa.

²⁹Bobobak inanggapnea bonok noingkag tougat; kumosing in sia aka intau moponakuḷ in ginubat.

³⁰Unap kon siannea naonda bonsig in botoḷ inta moḷanit. Naonda bo pakakat pomomupuḷ[63] sia in nongari kon yoná bo binotaknea.

³¹Dagat kinauinea dá naonda bo tubig modidí; naonda bo pansi pinodungúan kon ḷana inta mogoḷagak.

³²Sia in nonaḷámai kon ḻiod in sioḷ inta monindar, dagat binaḷuiannea nobaḻí burá inta mobudó in batangannea.

³³Kon tudu in butá diábí in mokotaḷow kon inia; mahaḷuk inta diábí koondok, tuata in sia!

³⁴Mahaḷukpa inta totok in moḷantud yo inanggapnea doman totok in moompá; kon sigad in bayongan mahaḷuk moraat, sia in nobaḻí datu.”