Read Mongondow AYUB 42 Bible Online

AYUB 42 - Mongondow bible

AYUB 42

¹Tubag i Ayub kon i TUHAN, “Kinotaauanku, o Allah, kon Iko Inta Totok in mokawasa; Iko in mokoaidbí kon onukadon.

³Iko in noḻibó mongo nongonu sin akuoi in mokobaḻíbí in diá mopirisaya kon hikmat-Mu bokaka akuoi tontaní in diábí nonotaau in onu bo onu. Akuoi naa in nosingog kon onu mita inta diá kinomangaḻeanku, onu mita inta totok in mokoherang kon inakó naa.

⁴Pinoki indongogan-Mu in akuoi kon tungkuḷ in Iko nosingog, bo motubag aka moḻibó in Iko.

⁵Dungkuḷmai, Iko in tongábí kinotaauanku sin dinongogku kon ouman in intau, táe tanaa in kinotaauanku in Iko sin noyogintayowan mako.

⁶Tuamai in mooyá in akuoi monorop kon bayongan in tosingogonku bo takin momanasaḷ akuoi in ḻimitú kon butá bo ḷobud.”

⁷Naonda in nopaḷut mako nosingog kon i Ayub, nogumandon in ki TUHAN kon i Elipas, “Tumorú in Akuoi kon inimu bo kon yobayatmu taya dua, sin diá inouman monimu totu-totuu ki ine in Akuoi. Táe mogogundoi-Ku ki Ayub in diábí natua.

⁸Dá, gamádon in tanaa sapi koḷakian pitu bo domba koḷakian pitu, bo bayádon kon i Ayub. Bo posumbadon intua komintan mobaḻí kuruban payongon kon inimu. Sambayangan i Ayub in moiko bo tarimaan-Ku in sambayangnea. Moiko in diábí pokopooyáan-Kumai, umpakabí patus in moiko motarima kon hukuman. Diá inouman monimu kino banar ki ine in Akuoi, ná inta inouman i Ayub.”

⁹Ki Elipas, ki Bildad bo ki Zopar in nogaid kon onu inta pinoki aid i TUHAN, bo ki TUHAN in notarima kon sambayang i Ayub.

¹⁰Onda intua, naonda in sinambayangan i Ayub in yobayatnea taya toḷu, binaḻí i TUHAN in sia nooyúondon totok bo nobogoi bui kon inia kodua in bayongnea nongkon bayongan in kapunyaannea inta dungkuḷ.

¹¹Komintan ki guya-guyang ḷoḷaki bo ki utat bobay i Ayub, bo bayongan intau inta nogogintaauannea koḻipod, namangoi nokipodungkuḷ kon inia bo nononbobutungan noyotakinnea kon baḷoinea. Mosia in noguman kon noitakin doman morobonoḷ in gina monia kon bayongan bodito inta pinoantug i TUHAN kon inia, bo noḻipoi kon inia. Mosia kon batúannea nobogoi in doit bo sising buḷawan tobatú kon i Ayub.

¹²Ki Ayub in binarakatan i TUHAN kino bayong totok kon ki agat in kinobiagannea, nongkon inta dungkuḷ kon dodai in sia diápa kinoantugan in bodito. Ki Ayub in kodomba bembé 14.000, unta 6.000, sapi 2.000, bo keledai 1.000.

¹³Sia in bui nokouḻí kon adí ḷoḷaki taya pitu bo adí bobay taya toḷu.

¹⁴Ki adínea bobay inta guya-guyang in sinangoiannea ki Yemima, induanea in ki Kezia, bo inta muit in ki Kerenhapuk.[64]

¹⁵Kon bayongan in butá diábí in mongodeaga ná koḷoḷunat in adí mita i Ayub taya toḷu tua. Mosia tua in inogoian in tonsilai kon kapunyaan i amánea, notongkai ná ki utat mita monia inta ḷoḷaki.

¹⁶Nopaḷut mako in bodito tatua ki Ayub in nobiagpa mogatut bo opat nopuḷú notaong in koonggotnea, dá nokoontongpa in sia kon i ompunea mita nodapot kon ompu kon duḷud.

¹⁷Bo minatoidon in ki Ayub kon dodai in nogoguyangdon totok.