Read Mongondow AYUB 5 Bible Online

AYUB 5 - Mongondow bible

AYUB 5

¹Pomaḷúdon, ei Ayub, oyúon degá in motubag? Malaekat táonda in pokituḷunganmu?

²Tongábí intau inta bodok in matoi dinia in nakit in ginanea.

³Nokoimontandon inontongku in intau bodok; kobiagannea koontongan moroton totok. Táe nodaḻídon kinutukku in pinogutunannea.

⁴Dá ki adínea mita in diábí nokoimontanmai in sinuḷungan; doíbí in moibog moduḷu kon i monia kon pongadilan.

⁵Onu in batunon monia kon gobánea, nodait kinaan in intau inta diá in bonu in siannea. Nodapot in gandum inta kon yuak in dugi,[9] nodait kinaan in intau inta ginogoi. Kapunyaan bo kaoyúonan monia umuran tarapon mako in intau inta moibog in kapunyaan.

⁶Deemanbí nongkon dunia in momuká in moraat; deemanbí nongkon butá momuká in roriga.

⁷Deeman! Táe intaubí tontaní inta mopoangoi in bodito kon inia, naonda bo rosik in baga in tuḷú momukábí nongkon tuḷúnea tontaní.[10]

⁸Aka akuoi in ná kaadaanmu, yo mokuanibí in akuoi kon i Allah. Kon i-Nia in popongaduanku, poḷat moposarakan in pelekaraku.

⁹Aid mita i Allah diá in poḻiuan; diábí komangaḻean naton intua. Inta mokoherang mita inta inaidan-Nea, diádon koiapan bo diábí modait-dait.

¹⁰Sia in nopoangoi in uyan kon tudu in butá, dá gobá bo rawang nobuntad sin kinouyanan.

¹¹Siabí in ki Allah inta nopoḷantud kon intau inta moompá in dodia, bo moposanang kon intau inta noyoyiga.

¹²Iḷamboian-Nea in tomayá in intau diá motuḻid in gina, dinomok-Nea in intau inta mobarong in akaḷ, dá bayongan inta iḷongasi monia in diá motuoi, bo mosia in kinoakaḷan bui in uboḷ monia tontaní.

¹⁴Kon tungkuḷ in singgai mosia kokoḷoban in sindip, mongokap naonda bo doḷom.

¹⁵Táe ki Allah in noposaḷamat: kon intau nobogá[11] nongkon kopatoian, kon intau inta moyangkó nongkon pinononggataan.

¹⁶Tanaa in oyúonpa bui in kamang kon intau inta diá koonu bo onu. Bo intau moraat in tongádon kibio-biómai diádon moposingo-singog, sin pinomponandon i Allah in bibignea.

¹⁷Nomujurdon totok in iko aka ki Allah nonoboḷow kon inimu! Dika moyaat in gina aka torúan-Nea in iko.

¹⁸Sin ki Allah in mopouma in takit, yo Siabí doman in mongundam. Bo ḻima-Nea inta nosambok, in inta bui momidai.

¹⁹Aka anib bo mopogogondok, iko in umuranbí posaḷamaton.

²⁰Aka koantugan in malarat in kaanon, yo iko in diábí matoi in gogoy. Aka parang motoyangdon totok, yo iko in moiyayúbí kon popatoi.

²¹Iko in ḷukadanbí nongkon tapud bo ouman inta diá totuu; sinayowanmu in bodito takin diá moondok.

²²Aka aid moromú bo gogoy moibaba, yo motababí in iko bo tongábí kumosing. Iko in diábí moondok bo moḻia-ḻiaw in gina, in tumayow kon biag moraat inta morogi.

²³Gobá tudunea inta pinajekomu in diábí in batunea; biag kaḻig in diábí mogaḷow kon inimu.

²⁴Iko in moamanbí in mogutun kon ḷoḷaiganmu; bo aka indoianmu in dombamu mita, yo komintanbí nosaḷamat, diábí in nogaat.

²⁵Ki adí bo ki ompumu in diá bidon koiapan, mosia in nádon kobayong in bonok kon rawang.

²⁶Naonda bo gandum inta noḷutú, iratab kon wakutunea, iko in mobiagbí doman mopia modapot in mogoguyang.

²⁷Ayub, tua komintan in aindon sinaridian nami. Totuubí in tosingogon tatua, dá tarimadon mako.”