Read Mongondow AYUB 6 Bible Online

AYUB 6 - Mongondow bible

AYUB 6

¹Bo ki Ayub notubag, “Akakuma bo roriga in ginaku naa bo simbangon in kobogatnea,

³yo noiḻiubí in sibuḷnea kon bungaion in baḷangon. Dá dikabí moherang aka tosingogonku mita diádon muna irai bo ḻimika-ḻikatdon.

⁴Piot nongkon i Inta Totok in Mokawasa noiḷambai kon awakku; bisanea in noibaya-bayádon kon bayongan in putú bo awakku. Kotoyang i Allah totok in mokoondok, bo nondangat kon inakó naonda bo tontara in musung.

⁵Keledai in mooropbí aka pokaanon in bonok inta nonubu, natua doman in sapi aka ogoian in kaanonnea.

⁶Táe kaanon inta noḻiau, ki inebí in moibog? Diábí doman pusi in natu bo oyúon in nanamnea?

⁷Doíbí in akuoi moḻiai kon tua; mobú[12] in akuoi aka mokaan kon tua.

⁸Nongonu sin doíbí in ki Allah mokidongog kon sambayangku? Nongonu sin diábí pinandung-Neamai in kuaniku?

⁹Igumon mako moibog in ki Allah morimumud kon inakó! Igumon mako Sia momongkug bo moḻimod kon inakó!

¹⁰Aka kon inakó tua in nobaḻíbí ḻipoi in gina; akuoi in motayokbí kon bonu in roriga. Bayongan in parenta i Allah Inta Totok in Mokudus, aindon dinuduianku bo tantúku inindoianmai.

¹¹Onubí in ropotku nodapot in akuoi tantúpa oyúon? Onu in kamangku kon mobiagpa moonggot?

¹²Ná degá korigon in batu in awakku naa? Nongkon bitú degá in awakku naa?

¹³Nodaitdon in ropotku notayak kon totuḷung; diádon in totuḷung kon inakó.

¹⁴Kon bonu in roriga[13] ná tanaa, moibog in akuoi kon yobayat inta totuu moyobayat. Umuranpa degá in akuoi motoindudui andeka monaḷámaidon kon ki Inta Totok in Mokawasa.

¹⁵Táe moiko, ei yobayat mita, diá motaau pirisayaan bo pongata. Moiko in naonda bo ongkag inta noingkag, aka diádon monguya-nguyan.

¹⁶Moiko in naonda bo ongkag inta noḷonong bo diá moḻimbok, sin kinokoḷoban in salju bo tubig inta nokontoi.

¹⁷Naonda in moiangoidon in sempo in pononinggai, salju bo eis tatua in baḷúdon mobuḻi bo diádon in paḷotnea. Apad in ongkag nobaḻídon noingkag, diádon in tubignea bo noingkagdon totok.

¹⁸Mododondaḷoi mita in moiḷangkam kon dodai in motayak kon tubig; mosia in modondaḷoi bo matoi kon rawang in bungaion.

¹⁹Mododondaḷoi nongkon Syeba bo nongkon Tema notayak kon tubig tatua bo nongamang mako.

²⁰Táe kamang monia tua diá in mangaḻenea kon bingkí in ongkag inta diá in tubignea.

²¹Naonda[14] bo ongkag tatuata in moiko, yobayatku; iko inumundok bo noondok in nokoontong kon rorigaku.

²²Nongonu? Degá oyúon in inigumku kon inimu? Andeka nopotabá kon inimu nobogoi in doit kon intau popisí in kopontinganku?

²³Degá akuoi nopoigum sinbá posaḷamaton bo tobuton nongkon musung inta diá kototabi?

²⁴Yo, tundúdon in akuoi, poontongdon in taḷáku! Kibio-bióbímai in akuoi bo mokidongog kon tosingogonmu.

²⁵Tosingogon mita inta motuḻid mokoonow kon gina, táe singogmu nion diá in bonunea, diá in mangaḻenea!

²⁶Bayongan in tosingogonku tongábí inanggap monimu tompot; diá in mangaḻenea moiko in motubag kon inakó inta ain kinobuḻian in kamang.

²⁷Nodapot in adí uno-unon sinayak monimu in daḷan kobiagannea pinongin nopogonik in undi, yobayatmu modagin inakaḷan monimu sinbá mobaḻí mooyúon.

²⁸Tungkuḷai, tondudutka in akuoi; umpaka yo monguboḷ in akuoi kon inimu?

²⁹Dika mopoaid kon inta diá motuḻid, kosadardon! Dika mopotaḷá kon inakó, akuoi in totuubí kon diá kotaḷá.

³⁰Degá kai monimukamai dá nonguboḷbí in akuoi, diá motaau mopoyoposi kon inta mopia bo inta moraat?