Read Mongondow AYUB 7 Bible Online

AYUB 7 - Mongondow bible

AYUB 7

¹Intau tua in naonda bo pinakisa mogaid kon oaidan; mobogat in kobiagannea naonda bo kobobiag in intau noniguan;

²naonda bo ata inta mogoḷat mako kon totuḷung; naonda bo mogogaid inta mogoḷat mako kon tondan in pinogaidannea.

³Kon buḷanannea kobiaganku diá in mangaḻenea; muḷoi in doḷom ginaku mopuḻing in robonoḷ.

⁴Aka akuoi mayá mosiug, doḷom moonggot mobayag; kotanobanku in bayag, diá mopia in mosiug in korasaanku.

⁵Awakku nopuḻing in oḷuasi bo dugú pongukudan; kuḻitku sinompaḻían bo ḷuaian in bobog.

⁶Kobiaganku inta diádon in kamang ḻimikat in mopobayá in imbuitnea, noiḻiu kon ḻikat in intau mogogaboḷ moburow kon gogaboḷannea.

⁷Toropdon, o Allah, kobiaganku in tongábí tompot poginaan; kobiaganku inta mopia in nobuḻi, diá in toimpaḷot.

⁸Tanaa Iko in noindoi kon inakó — táe diábí noonggot intua. Aka akuoi bain tayakon-Mu, dá diá bidon.

⁹Naonda bo goḷom inta ontongon mako bo mayádon, intau in matoi domandon, diá bidon mobui mangoi. Bayongan intau inta nokoimontandon nonotaau kon inia, mokoḻiongdon kon inia bo diá bidon toroponnea bui.

¹¹Tuamai akuoi in diá bidon motaau in tongá kibio-biómai! Pomporí bo pait in ginaku in diábí motaau bunionku. Mustibí in akuoi mobuká kon bibigku, bo mopoḷuai in onu in kon bonu in ginaku.

¹²Nongonu sin akuoi in umuranbí indoian-Mu bo ḷukadan-Mu? Eta degá akuoi naa naga in dagat[15] inta mokoanib?

¹³Akuoi in inumuḻid bo monungkuḷ mopoguḻí in ḷopí; akuoi in mopogaan in ginaku inta mokayow.

¹⁴Táe gogondokon-Mu in akuoi in togoindop; Popoangoi-Mu in togoindop moraat bo gina ḷumayang.

¹⁵Dá moibo-ibogbí in akuoi tagangan bo matoi bo dika in mobiag kon bonu in awak nopuḻing in roriga naa.

¹⁶Moḷopí bo mobú in akuoi in mobiag; moibogdon in akuoi in matoi! Pomayádon mako in akuoi, sin diá in mangaḻe in kinobiaganku.

¹⁷Nongonu sin intau in mopontingbí kon ini-Mu? Nongonu sin dodianea in umuranbí taridian-Mu?

¹⁸Tantú-Mu angoion taridian in sia pomuḷoi in doḷo-doḷom, bo pomuḷoi mako tungkuḷan-Mu in sia.

¹⁹Degá toonu in Iko mobobui kon inakó, dá moiḻiomdon in akuoi kon ibogku?

²⁰Ei moḷoḷukadku, morugi degá in Iko popisí in dosaku? Nongonu sin tanáan-Mubí mako in piot-Mu in akuoi? Degá mobogatdon totok in aidku kon ini-Mu?

²¹Diádon degá mokoampung in Iko kon dosaku? Diádon degá in Iko mokopopat kon taḷáku? Diádon moonggot bo akuoi moiuḻid kon bonu in poḷoḷobongan, bo aka tayakon-Mu in akuoi, diá bidon mouḻí-Mu.”