Read Mongondow AYUB 8 Bible Online

AYUB 8 - Mongondow bible

AYUB 8

¹Bo nosingogdon in ki Bildad, “Modapotpa in toonu in iko in mosingog natua? Singogmu mita naonda bo tompot inta mogirup moropot.

³Ki Allah in diábí kon dodai in onda in momelung kon koadilan; diábí kon dodai in onda in diá mokoposindog kon inta mobanar.

⁴Degá ki adímu mita in binaradosadon kon i-Nia, dá patusbí in mosia ihukum-Nea.

⁵Táe aka Iko moniung kon i-Nia, mopoigum in totabi bo mopoigum in ampung,

⁶aka ginamu mojujur, diá in noitaḷá, ki Allah in ḷagibí motuḷung kon inimu, bo mobaḻí tontuḻínea, tonibuḷoimu in buidon tompiaan.

⁷Kaoyúonanmu inta nobuḻi tua in diábí in mangaḻenea poyotongkaionmai kon onu in inta bain bui mouḻímu.

⁸Intau moarip tungkuḷ intua musti indoianmu, bo tano-tanobonmu in pongalaman in mogoguyang.

⁹Kobiagan naton in notoyong, kita in diábí nonotaau kon onu bo onu; singgai mita naton naonda bo oḻinow.

¹⁰Indongogaipa in singog in intau moarip tatua koḻipod, mosia in nobogoi in totundú tanaa kon inimu,

¹¹‘Tongábí kon tampat inta oyúon in tubig mobiag in bumbung; bakung in tongábí mobiag kon butá inta noyoná.

¹²Aka moingkag in tubignea, bumbung tua in matoibí, moiunabí kon pinomuḷa ibanea. Bokaka noḷumbápabí bo deemanpabí wakutunea, sia in pongkóon bo popobaraguna.

¹³Natuata in intau inta diá kotuhan. Sia in nokoḻiong kon i Allah, dá nobuḻidon in kamang.

¹⁴Siningkoi tougat inta moḷukó tua in pongongatanea; baḷom-baḷoi in tontoḷawá in nobaḻí oandoḷannea.

¹⁵Moropot degá in pugad tatua aka baḻíon oandoḷan? Mokotahang degá in siningkoi tatua aka baḻíon kokadaian?’

¹⁶Naonda bo padang, mosehat in intau inta diá kotuhan; aka sindaran in singgai, mobiag in sia moḷumbá bo momuḻing kon gobá.

¹⁷Uakatnea in moikeket[16] kon batu mita kon butá; moikeket totok, diábí mogampang motundan.

¹⁸Táe, tungkuḷaika, rabut in tanaa mako in padang tatua, dá naonda bo diábí kon dodai in onda in sia in kon tua.

¹⁹Oo, kasanangan in intau moraat tongábí tua; intau ibanea in mamangoi bo monoḷuan kon inia.

²⁰Táe ki Allah in diábí kon dodai in onda in monaḷámai kon intau inta motoindudui, bo diábí doman kon dodai in onda in Sia in motuḷung kon intau moraat.

²¹Bibigmu in baḻíon-Neabí kumosing, bibigmu in modondongbí takin pia in gina.

²²Intau inta mondoí kon inimu in mooyábí bo morasa kon moompádon, bo baḷoi in intau moraat in poguyaatonbí modapot in moyopú.”