Read Mongondow MAZMUR 102 Bible Online

MAZMUR 102 - Mongondow bible

MAZMUR 102

¹Sambayang in intau nororiga inta noḻemédon in mogamui kon i TUHAN.

²O TUHAN, indongogaipa kaasí in sambayangku, biódon mako kuaniku modapot kon ini-Mu.

³Dika toḻikudan in akuoi aka koumaan in susa in akuoi. Indongogaipa kaasí in akuoi aka mokuani, bo ḷagidon tubagai in akuoi.

⁴Kobiaganku in moinggamá naonda bo poyok; tuḷanku mita in monombaga naonda bo tuḷú.

⁵Mokoḷung in akuoi naonda bo bonok noingkag, bo diádon in ibog mongaan.

⁶Moropot in karakku; awakku in dongkadon tuḷan binakut in kuḻit.

⁷Akuoi in nádon onda bo ḷagapan undan kon padang gurun, naonda bo ḷagapan monikuḷu kon apug inta noingongow.

⁸Akuoi in diá mokosiug, naonda bo ḷagapan inta tongá sia-sia mita kon binubungan in baḷoi.

⁹Kinoouput in singgai musung moningkuḻe kon inakó; tangoiku in binaḻí kutuk i intau mita inta tumorú kon inakó.

¹⁰Akuoi in mokaan kon ḷobud naonda bo roti, oinumonku noyobauk in ḷuá,

¹¹sin Iko in nobuatdon bo nopogambat kon inakó kon bonu in torú-Mu inta sinumaga-tagab.

¹²Kobiaganku in moitaḻib naonda bo oḻinow ḷoḷabungnea; akuoi in noḷaḷow naonda bo bonok.

¹³Táe Iko, o TUHAN, Datu inta mononoi, táe umuran sinorop dapot in adí bo ompu monag.

¹⁴Iko in simindogbí bo monotabi kon Sion, nodapotdon in wakutunea monotabi kon inia.

¹⁵Sin mogogundoi-Mu in moibog kon inia, umpaka nobaḻídon apug in sia. Mosia angoian in tabi kon inia, umpaka nobaḻídon in sia ḷobud.

¹⁶Kawasa i TUHAN in koondokbí in bangusa mita; bo koḷoḷantud-Nea kobangkaḷ in bayongan in datu,

¹⁷aka ki TUHAN moposindog bui in Sion, bo simindog kon bonu in koḷoḷantud-Nea.

¹⁸Sia in mokidongogbí kon sambayang in umat-Nea kon bonu in roriga, bo diábí mondoí kon oigum monia.

¹⁹Paisdon in bayongan inta inaidan i TUHAN kon intau mita inta moiduduimai, sinbá bangusa inta diápa pinononggadí motaaudon modayow kon i-Nia.

²⁰Ki TUHAN in nobobui nongkon tampat-Nea inta moḷantud, nongkon soroga iḷumongow in Sia kon butá

²¹sin mokidongog kon amui in intau inta kon bonu in ponjara bo mopoḷuat kon intau inta hukumon matoi.

²²Dá tangoi-Nea in popotaa-taau mako kon Sion, bo Sia in dayo-dayowonbí kon Yerusalem,

²³kon dodai in bangusa mita bo dodatuan mita noyosipun sin mosumba kon i TUHAN.

²⁴Ki TUHAN in nomutoḷ kon ropotku kon tungkuḷ in akuoi noguodpa, bo nogimpoḷok kon umurku.

²⁵Bo akuoi in noguman, “O Allah dikapa gamáan in nyawaku kon kinotombotakan in kobiaganku.” TUHAN, Iko in mobiag mononoi,

²⁶dungkuḷmai Iko in nomaḻí kon butá; ḷangit in Iko doman kitogi mia.

²⁷Tua komintan in moinggamábí, táe Iko in umuranbí oyúon; tua mita in mokoyonganbí naonda bo pakeang. Ḷumbúon-Mu intua naonda bo ḷambung nokoyongan, bo komintandon moputú.

²⁸Táe Iko in diábí mobaḷu-baḷui, kobiagan-Mu in diábí in imbuitnea.

²⁹Adí bo ompu nami in mobiagbí motompia, bo umuran moodom kon bonu in ḷukadan-Mu.