Read Mongondow MAZMUR 103 Bible Online

MAZMUR 103 - Mongondow bible

MAZMUR 103

¹Nongkon i Daud. Dayowdon ki TUHAN, ei dimukudku, ḻimbatú in ginaku, dayowdon in tangoi-Nea inta mokudus.

²Dayowdon in ki TUHAN, ei dimukudku, dika ḻiongon in bayongan in kopopia-Nea!

³Sia inta mongampung kon dosamu, inta nongundam kon bayongan in takitmu,

⁴Sia inta nopoḷuat kon nyawamu nongkon poḷoḷobongan, inta takin tabi nobogoi kon inimu bo nonotabi.

⁵Sia inta nopoorop kon kobiaganmu [55] in inta mopia, dá iko in umuran moguod naonda bo ḷagapan boniá.

⁶Ki TUHAN in mopobayá in hukum bo kooadil kon bayongan in intau inta dinorot.

⁷Sia in moponiata in tomayá-Nea kon i Musa bo oaid-Nea mita kon bangusa in Israel.

⁸Sin ki TUHAN in motabi bo mopia in gina Sia in mosabar bo tabi-Nea in moiḻiu ḷoben.

⁹Sia in diábí umuran mongguak, bo diábí mononoi in torú-Nea.

¹⁰Sia in diábí mohukum kon inaton podudui in dosa naton, andeka motuḻí kon inaton podudui in taḷá naton.

¹¹Táe ná sigad in ḷangit bo butá, natua in koḷoben in tabi-Nea kon intau inta motoguondok kon i-Nia.

¹²Ná kinoyoyayú in pomukaan kon toyopan, natua in kinoyoyayú in pinoḷumbúan-Nea kon dosa mita naton.

¹³Naonda bo tabi i amá kon i adínea mita, natuata in tabi i TUHAN kon intau inta motoguondok.

¹⁴Sin kinotaauan i TUHAN kon kita naa in pinomia nongkon onu, kinotoropan-Nea kon kita naa in tongábí ḷobud.

¹⁵Intau naa in kobiagannea in motoyongbí naonda bo bonok; sia in mobiag naonda bo bungang kon gobá;

¹⁶aka irupon in tompot, dá diádon in sia, nodapot in tampatnea diádon kinotaauan.

¹⁷Táe ki TUHAN in umuranbí motabi kon intau inta motoguondok, kopopia-Nea in modapotbí kon adí bo ompu

¹⁸kon intau inta kinumadai kon dodandian-Nea, bo takin satia mopoaid in parenta-Nea.

¹⁹Ki TUHAN in nomarenta kon soroga, Sia in datu inta nongawasa kon bayongan in yagi-yagi.

²⁰Dayowdon in ki TUHAN, ei malaekat-Nea mita inta mongotorindog, inta nokidongog bo nopoaid in onu inta pinoki aid-Nea.

²¹Dayowdon in ki TUHAN, ei bayongan in mahaḷuk kon soroga, bayongan in mogogundoi-Nea inta nogaid kon kinoibog-Nea.

²²Dayowdon in ki TUHAN, ei bayongan in inta binaḻí-Nea kon sinangkub in butá inta kinawasa-Nea. Dayowdon ki TUHAN, ei dimukudku!