Read Mongondow MAZMUR 104 Bible Online

MAZMUR 104 - Mongondow bible

MAZMUR 104

¹Dayowdon in ki TUHAN, ei dimukudku! Totuu moḷantud in Iko, o TUHAN Allahku! Iko in nopogiḷambung in koyunggaga bo kamuliaan,

²bo kinoḷubungan in sindar. Iko in nomukat kon ḷangit naonda bo ḷoḷaigan,

³bo noposindog in Baḷoi-Mu kon tudu in tubig kon ḷangit. [56] Goḷom mita binaḻí-Mu kereta-Mu, Iko in sinumakoi kon koḻikip in tompot.

⁴Tompot in binaḻí totabá-Mu, bo kilat in mobobantung-Mu.

⁵Pinoḻitú-Mu kinorigon in butá kon dodoyonannea, dá diábí modandú modapot in mononoi.

⁶Kinoḷubungan-Mu in baḷangon intua, tubignea in nonagom kon tudu mita in buḷud.

⁷Kon dodai in ginuakan-Mu, tubig tatua noiḻig, noiḻig notorú popisí in doḷodok in singog-Mu.

⁸Tubig in noiḻig nongin buḷud mita noituot kon ḷopá, kon tampat inta sinadia-Mu kon inia.

⁹Sinantú-Mu in sigadnea mita inta diá motaau bayáannea, sinbá diádon bui monagom kon butá.

¹⁰Pinoḷuai-Mu in bokaká mita kon ḷopá mita, tapá in moiḻig kon sigad in tombuḷud mita,

¹¹sin mopoinum kon bayongan in mahaḷuk kon gobá, bo mopoguḻí in rogang kon keledai mita kon kayuon.

¹²Kon diugnea ḷagapan mita momia kon pugadnea; mosia in monontuoḷ kon sigad mita in daun.

¹³Nongkon ḷangit pinoonag-Mu in uyan kon buḷud, butá nopuḻing in aid in ḻima-Mu.

¹⁴Iko in nomiag kon bonok kokaanon in bobiagon, bo kon intau in noyagi-yagimai in pinomuḷa. Dá motaaudon in sia monompinomuḷa,

¹⁵bo mobogoi in anggur inta mokopia kon gina. Ḷana in zaitun doman inta mokotarimbuka mako kon pogotnea, bo kaanon inta mokoropot kon inia.

¹⁶Pangkoi mita in kayu i TUHAN in nokouḻí kon uyan mobayong pangkoi in ḷokuyú in Libanon inta pinomuḷa-Nea tontaní.

¹⁷Kon tua monompugadon in ḷagapan mita, ḷagapan ranggung nonompugad kon ḷuntungnea totok.

¹⁸Buḷud mita moḷantud nobaḻí tampat in bembé in kayuon; rusa in mogadop kon batu karang.

¹⁹Binaḻí-Mu in buḷan nobaḻí tomponuot kon wakutu, mata in singgai kotaauannea in wakutunea tumoyop.

²⁰Aka poangoi-Mu in sindip, singgai in modoḷomdon, bo bayongan in mahaḷuk kon kayuon in maya-mayá mako.

²¹Singa mita batánea moganggor motayak kon kaanonnea, moigum kon kaanon inta sinadia i Allah.

²²Aka momukádon in mata in singgai, moḷagui in mosia bo umuḻid kon pogogadopannea.

²³Bo ḷumuaidon in intau sin mogaid kon oaidannea, bo umuran mogaid modapot in ḷoḷabungnea.

²⁴Totuu mobayong in mia-Mu, TUHAN, komintanbí pinomia-Mu takin mobijaksana; butá in nopuḻing in aid-Mu.

²⁵Indoiaidon in dagat inta nooḷad noibontang, takin mahaḷuk inta moḷoben mointok diá koiapan.

²⁶Kon tua in kapaḷ mita ḷumeag, bo Lewiatan, naga in dagat inta binaḻí-Mu, mogogitogmai. [57]

²⁷Mosia komintan in mogoḷatbí mako kon ini-Mu, sinbá mokouḻí kon kaanon kon wakutunea.

²⁸Iko in nobogoi, bo mosia in nosipun kon tua, Iko in noposadia kon tua, bo mosia in nongaan nodapot in noorop.

²⁹Aka iko monoḻikud, moondok in mosia; aka gamáan-Mu in poginaannea, matoi in mosia, bo mobaḻí bui ḷobud naonda bo dungkuḷ.

³⁰Táe aka mosia ogoian-Mu in poginaan, [58] mosia in binaḻí; Iko in nobogoi in kobiagan mobagu kon butá.

³¹Igumon mako koḷoḷantud i TUHAN in mononoi! Igumon mako mopia in gina-Nea takin in bayongan inta binaḻí-Nea!

³²Inindoian-Nea in butá bo pinomia-Nea nourot, buḷud mita iḻiai-Nea, dá iḻumuai in poyoknea.

³³Akuoi in moibog modondong kon i TUHAN kon dodai in akuoi mobiagpa, mopodondong in dodayow kon i TUHAN kon bonu in akuoi oyúonpa.

³⁴Igumon mako dondongku in mokosanang kon gina-Nea, sin Siabí in nopoḷunganga kon ginaku.

³⁵Biódon mako in intau binaradosa moinggamá kon dunia naa, biódon mako in intau moraat modait moyopú. Dayowdon in ki TUHAN, ei dimukudku! Dayowdon in ki TUHAN!