Read Mongondow MAZMUR 107 Bible Online

MAZMUR 107 - Mongondow bible

MAZMUR 107

¹“Posukurdon kon i TUHAN sin Sia in mopia, tabi-Nea in mononoi totok.”

²Bui-buimaidon singog intua, ei moiko inta ain pinosaḷamat nongkon susa.

³Moiko in sinipun-Neadon nongkon butá mita in intau ibanea, nongkon pomukaan bo toyopan, utuan bo toḷatan. [60]

⁴Oyúon in nodondaḷoi kon kayuon, bo diá nonotaau in daḷan mayá pinogutunan kon kotá.

⁵Mosia in inaput in gogoy bo yogang bo kinobuḻian in bayongan in kamang.

⁶Kon bonu in susa mosia in nokuani kon i TUHAN, bo pinoḷuat-Nea in mosia kon roriga.

⁷Sia in nodia kon i monia nongin daḷan inta notuḻid minayá in pinogutunan kon kotá.

⁸Patusbí in mosia mosukur kon i TUHAN popisí in tabi-Nea, popisí in mia-Nea mita inta mokotongaw kon intau.

⁹Sin Sia in mopoorop kon intau inta noyogang, bo mobogoi in mobayong inta mopia kon intau ginogoi.

¹⁰Oyúon in iḻimitú kon bonu in sindip, intau pinonjara inta nororiga kon bonu in umantungan uatoi,

¹¹sin mosia in nomarontakdon kon i Allah bo diá nopandungmai kon parenta i Inta Totok in Moḷantud.

¹²Sia in nomutuk kon gina monia pinongin oaidan mobogat; mosia in noḷabú bo diá in notuḷung.

¹³Kon bonu in susa mosia nokuani kon i TUHAN, bo pinoḷuat-Nea in mosia kon roriga.

¹⁴Dinia-Nea in mosia iḻumuai nongkon sindip, bo nomutoḷ kon pinoumantungan kon i monia.

¹⁵Patusbí in mosia mopoyaput in sukur kon i TUHAN popisí in tabi-Nea, popisí in mia-Nea mita inta mokotongaw kon intau.

¹⁶Sin Sia in nogumpag kon ngara mita bitú, bo nomutuk kon bilabag mita uatoi.

¹⁷Oyúon in dondunguḷ bo nororiga popisí in dosa mita monia, bo iroriga popisí in taḷá monia.

¹⁸Mosia in doídon kon bayongan in kokaanon, singgai kopatoian monia in nodiugdon.

¹⁹Kon bonu in susa, mosia in nokuani kon i TUHAN, bo pinoḷuat-Nea in mosia nongkon roriga.

²⁰Sia in nongundam kon i monia pinodoyon kon parenta-Nea, bo nopoḷagui kon i monia nongkon bubú in poḷoḷobongan.

²¹Patusbí in mosia mopoyaput in sukur kon i TUHAN popisí in tabi-Nea, popisí in mia-Nea mita inta mokotongaw kon intau.

²²Biódon mako in mosia mopoyaput in sukur poḷat modia kon sosumba, bo mopotaa-taau mako in aid-Nea pongin dondong pia in gina.

²³Oyúon doman inta iḷumoḷan kon dagat takin sinumakoi kon kapaḷ, sin motayak kon kobiagan kon dagat inta mooḷad.

²⁴Mosia in nokoontong kon aid mita i TUHAN, mia-Nea inta mokoherang kon dagat.

²⁵Podudui in parenta-Nea nogirupdon in deḷang bo noponomburádon kon bokoḷ mita.

²⁶Kapaḷ mita noibingkat noḷantud kon toḷungayá, bo pinogambat kon apad in dagat. Intau mita in kinobuḻiandon in barani in tumayow kon anib moḷoben tatua.

²⁷Noḷoḷangu in mosia bo noḷungkoyódon naonda bo intau noḷoḷangu bo kinobuḻiandon in akaḷ.

²⁸Kon bonu in susa mosia nokuani kon i TUHAN, bo pinoḷuat-Nea in mosia nongkon roriga.

²⁹Deḷang inta nondangat pinoki gogaian-Nea, nodapot in bokoḷ mita noḻenedon.

³⁰Nosanang in gina monia sin deḷang in noitaḻibdon; dinia-Nea in mosia kon totubuan inta niaton monia bayáan.

³¹Patusbí in mosia mopoyaput in sukur popisí in tabi-Nea, popisí in mia-Nea mita inta nokotongaw kon intau.

³²Mosia in nopoḷantud kon komomulia in TUHAN kon yuak in umat-Nea, bo nodayow kon i-Nia kon bonu in pinoyodungkuḷan in guhanga mita.

³³Ongkag mita binaḻí-Nea padang gurun bokaká binaḻí-Nea butá noingkag.

³⁴Butá mopia binaḻí-Nea rawang simuton, popisí in aid moraat in intau mita inta nogutun kon tua.

³⁵Padang gurun binaḻí-Nea tabang, butá noingkag binaḻí bokaká.

³⁶Intau mita ginogoi pinoutun-Nea kon tua; mosia in noposindog in kotá sin pogutunan monia.

³⁷Mosia in nogambor kon gobá mita bo nomuḷa kon pangkoi in anggur, bodongka mosipun kon bungai in boyónea inta mobayong.

³⁸Ki TUHAN in nobogoi in adí mobayong kon i monia, bo bobiagon monia in umuran momuí.

³⁹Táe mosia in sinaḷow bo dongkadon topiḻik popisí in roriga bo pinondorotan inta noḻingá.

⁴⁰Ki TUHAN in nopoompá kon mongongawasa monia, bo nopotabá kon i monia nodondaḷoi kon ḷopá in kayuon inta diá in daḷannea.

⁴¹Táe inta nobogá in pinoḷuat-Nea nongkon susa monia, motoḷuadí monia in modugang naonda bo paanan in domba.

⁴²Intau motuḻid in mokoontong bo mopia in gina, táe intau moraat in sinukuman.

⁴³Igumon mako intau mobijaksana in morai kon bayongan intua bo akúon monia kon ki TUHAN in umuranbí motabi.