Read Mongondow MAZMUR 108 Bible Online

MAZMUR 108 - Mongondow bible

MAZMUR 108

¹Dondong. Mazmur i Daud.

²Moropotbí totok in pirisayaku, o Allah, moibogdon totok in akuoi in modondong bo modayow kon ini-Mu. Ei, pobangondon, dimukudku!

³Ei pobangondon, gambus bo kecapi! Akuoi in moibog motomu kon singgai modiug mobayag.

⁴TUHAN, akuoi in moibog mopoyaput in sukur kon ini-Mu kon sigad in bangusa mita. Akuoi in moibog mopodondong in dodayow kon ini-Mu kon sigad in umat intau.

⁵Sin tabi-Mu in moḷoben modapot kon ḷangit bo kososatia-Mu in modapot kon goḷom mita.

⁶O Allah, poontongdon in koḷoḷantud-Mu kon ḷangit, bo kamuliaan-Mu kon sinangkub in butá.

⁷Posaḷamatdon in kami takin kawasa-Mu, tubagaipa kaasí in sambayang nami, sinbá intau mita inta kinotabi-Mu posaḷamaton.

⁸Nongkon tampat-Nea inta motusi [61] ki Allah in noguman, “Akuoi in monggiow bo mosila-silai kon butá in Sikhem, Ḷopá in Sukot in undion-Ku.

⁹Gilead bo Manasye in kapunyaan-Ku, Epraim in sapoyo uwaja-Ku, bo Yohuda in tungkud in dodatuan-Ku.

¹⁰Táe Moab in pomomataan-Ku kon sioḷ; Akuoi in monggiow kon kinountungan nongkon Pilistea. Kon i Edom pinogambatan-Ku in aip in sioḷ-Ku, saḷaku tomponuot kon sia in kapunyaan-Ku.”

¹¹Ki ine in modia kon inakó mayá in Edom? Ki ine in mokapit kon inakó mayá in kotá inta dininding tatua?

¹²O Allah, diá degá in Iko mayá moyotakin nami? Diá degá in Iko mayá moyotakin in tontara nami?

¹³Tuḷungaidon in kami in monayow kon musung, sin totuḷung in intau diábí in mangaḻenea.

¹⁴Moyotakin i Allah, kita in motorindogbí totok; Siabí inta monaḷow kon musung naton.