Read Mongondow MAZMUR 109 Bible Online

MAZMUR 109 - Mongondow bible

MAZMUR 109

¹Kon i itoi in mododondong. Mazmur i Daud. O Allah inta tantúku dayowon, dikabí kaasí tongá kibio-biómai.

²Sin akuoi in sinubu in intau moraat bo mouboḷ inta mongonguman magí-mako bo moponapud in uboḷ kon inakó.

³Mosia in monubu kon inakó pongin tosingogon mita inta nopuḻing in yaat in gina, bo nomarang kon inakó takin diábí in kinodoyonan.

⁴Mosia in moponapud kon inakó, umpakabí akuoi motabi kon i monia, bo ain sinambayanganku in mosia.

⁵Aidku mopia kon i monia tuḻían monia in moraat, bo tabiku in tuḻían monia in yaat in gina.

⁶Duídon in intau moraat tobatú sin monisig kon inia, biódon mako sia potaḷáan in saturunea.

⁷Biódon mako in sia sisigan bo poniata kon noitaḷá, bo biódon mako in sambayangnea anggapon dosa.

⁸Biódon mako in kobiagannea ḷagi mobuit, bo ḷoḻitúannea gamáan in intau ibanea.

⁹Biódon mako in ki adínea mita moton uno-unondon, bo ki buḷoinea bobay in mobaḻídon boba-bobay.

¹⁰Biódon mako in ki adínea mita in mobaḻí mogogundaídon magí mako, bo untunon [62] nongkon apug in baḷoinea.

¹¹Biódon mako in bayongan in kapunyaannea gamáan in mononagi kon boḻi, bo onu in siniḷopíannea agowon in intau.

¹²Dikabí oyúon in tumompia in gina kon inia, andeka motabi kon i adínea mita inta sinaḷáannea.

¹³Biódon mako in bayongan in buínea yopúon, bo tangoinea in ḻiongondon in intau moiduduimai.

¹⁴Biódon mako in aid moraat in mogoguyangnea umuran kotoropan i TUHAN, bo dosa i inánea in diábí popatan.

¹⁵Biódon mako in dosa monia umuran kotoropan i TUHAN, bo diábí in monanob kon i monia kon butá.

¹⁶Sin intau tatua in diábí kon dodai in onda in mokotorop kon mopoontong in tabi. Sia in momogutú kon intau nobogá bo inta mororiga, bo moḻimod kon intau inta diá mokopongonu.

¹⁷Sia in moibog mongutuk; biódon mako sia tontaní in kotugatan in kutuk! Sia in doíbí mobogoi in barakat, biódon mako diádon ogoian in barakat kon inia!

¹⁸Aka kon inia mongutuk tua in biasabímai, naonda bo moḷutud kon ḷambungnea. Biódon mako in kutuk tatua moiyanap naonda bo tubig kon awaknea, bo naonda bo ḷana kon bonu in tuḷannea mita.

¹⁹Biódon mako in kutuk tatua mongoḷob kon inia naonda bo ḷambung, bo umuran moḻikog kon inia naonda bo baan.

²⁰TUHAN, popoḷabúdon in hukuman kon i inta mopoponapud kon inakó, kon intau inta moguman kon uboḷ soaḷ akuoi.

²¹Táe tuḷungaipa kaasí in akuoi podudui in dandi-Mu, o TUHAN Allahku, posaḷamatdon in akuoi popisí in kopopia bo tabi-Mu.

²²Sin akuoi naa in nobogá bo nororiga, bo ginaku in kinekeban nodaḷom.

²³Akuoi in gogió bo nobuḻi naonda bo oḻinow ḷoḷabungnea, akuoi in pinomisik naonda bo pangkoḷá.

²⁴Duḷudku in mourot popisí in nopuasa, awakku in irumutukdon totok.

²⁵Intau mita inta mokoontong kon inakó moningkuḻe kon inakó poḷat momombiḻing.

²⁶Tuḷungaipa kaasí in akuoi, o TUHAN Allahku, posaḷamatpa in akuoi podudui in tabi-Mu.

²⁷Dá kotaauandon in musungku kon tua in aid-Mu mita, kon Iko, ki TUHAN, inta nogaid kon tua.

²⁸Umpaka mosia in mongutuk kon inakó, igumon mako Iko in momarakat kon inakó. Umpaka simindog in mosia, mosia in pokopooyáanbímai; táe igumon mako akuoi, mogogundoi-Mu, poḷungangaan in gina.

²⁹Biódon mako in intau mita inta moponapud kon inakó ḻibutan in empeng, bo oyá in mongoḷob kon i monia naonda bo jubah.

³⁰Akuoi in modayow kon i TUHAN takin singog moḷangon, mopowaya magí-mako kon i-Nia kon yuak in poyosipunan in umat.

³¹Sin Sia in moduḷu bo moposaḷamat kon intau bogá nongkon i monia inta mopoḷabú in hukuman matoi kon inia.