Read Mongondow MAZMUR 111 Bible Online

MAZMUR 111 - Mongondow bible

MAZMUR 111

¹Dayowdon in ki TUHAN! Takin ḻimbatú in gina akuoi mopoyaput in sukur kon i TUHAN kon yuak in pinoyosipunan in umat-Nea.

²Totuu kon mokoherang in aid mita i TUHAN, totokbí in mopia tonduduton in intau mita inta moibog intua.

³Aid i TUHAN totuu moḷantud bo dinayo-dayow, kooadil-Nea in mononoi totok.

⁴Ki TUHAN tua in motabi bo mopia in gina, Sia in nogaid kon inta mokotongaw mita, sinbá umuran kotoropan naton intua.

⁵Sia in nobogoi in rijiki kon intau inta motoguondok, bo inta umuran mokotorop kon dodandian-Nea.

⁶Sia in nopoontongdon in kawasa-Nea kon umat-Nea, pinongin nobogoi kon i monia in butá budel in bangusa mita.

⁷Ki TUHAN in moadil bo mosatia kon bayongan inta pomiaan-Nea, bayongan in parenta-Nea motaaubí pongata.

⁸Hukum-Nea in mononoibí modapot in kopaḷutan in dunia, inogoi-Nea pinodoyon kon inta kobobanar bo kooadil.

⁹Sia in nopoḷuat kon umat-Nea, bo nomia kon dodandian mononoi takin i monia. Sia tua in ki TUHAN inta mokudus bo motorindog!

¹⁰Ki ine in moibog mobijaksana musti mohoromat kon i TUHAN, [64] Sia in nobogoi in pomomangaḻe kon bayongan in intau inta motoḷutui. Dinayo-dayowdon in ki TUHAN dapot in mononoi!