Read Mongondow MAZMUR 115 Bible Online

MAZMUR 115 - Mongondow bible

MAZMUR 115

¹Deemanbí kami, o TUHAN, deemanbí kami, táe tongábí Iko in musti dayowon, sin Iko in mosatia bo umuran motabi.

²Nongonu sin bangusa mita in mustibí moguman, “Kon onda in ki Allah monia?”

³Ki Allah naton in kon soroga, Sia in mogaid kon onu in kinoibog-Nea.

⁴Berhala monia in pinomia nongkon buḷawan bo saḷaka, ḻima in intau in nomia.

⁵Mosia in kobibig, táe diábí mokosingog, komata táe diá mokoontong.

⁶Mosia in kobongoḷan, táe diá mokodongog kongiung, táe diá mokobó.

⁷Mosia in koḻima, táe diá mokokokap, kosioḷ, táe diá mokobayá, bo diábí in singog in ḷumuai nongkon sigoḷoknea.

⁸Igumon mako natua in ukur [65] in intau mita inta nomia kon tua, bo bayongan in intau inta mopirisaya kon inia.

⁹Ei intau in Israel, pongamangdon kon i TUHAN, Siabí in motuḷung bo mogoḻingoi kon i monimu.

¹⁰Ei imang mita, pongamangdon kon i TUHAN, Siabí in motuḷung bo mogoḻiung kon inimu

¹¹Ei bayongan in intau inta motoguondok, pongamangdon kon i TUHAN, Siabí in motuḷung bo mogoḻiung kon i monimu.

¹²Ki TUHAN in mokotoropbí kon i naton bo momarakat kon i naton, Sia in momarakatbí kon umat in Israel bo bayongan in imang buí i Harun.

¹³Sia in momarakatbí kon intau mita inta motoguondok, pinomayá mointok andeka moḷoben.

¹⁴Igumon mako ki TUHAN in mobogoi in adí mobayong, kon i monimu bo kon buímu.

¹⁵Igumon mako moiko in barakatan i TUHAN, inta nomaḻí kon ḷangit bo butá!

¹⁶Ḷangit in tongábí ki TUHAN in kitogi, táe butá in inogoi-Nea kon intau.

¹⁷Ki TUHAN in diábí dinayow in intau minatoi, in intau inta ain noponag kon tampat inta noingongow.

¹⁸Táe kita inta nobiag in mopoyaput in sukur kon i-Nia, tanaaya modapot in kopaḷutannea. Dayowdon in ki TUHAN!