Read Mongondow MAZMUR 116 Bible Online

MAZMUR 116 - Mongondow bible

MAZMUR 116

¹Akuoi in moibog kon i TUHAN, sin inindongogan-Nea in akuoi bo nonaridimai kon oigumku.

²Inindongogan-Nea in akuoi, pomuḷoi in akuoi mokuani kon i-Nia.

³Akuoi in inindoyó in anib in popatoi; popatoi inta mokoondok ain nodomok kon inakó, dá akuoi in inangoian in ḻia-ḻiaw in gina bo moondok.

⁴Dá nokuani in akuoi kon i TUHAN, “O TUHAN, poigumonku, posaḷamatpa in akuoi!”

⁵Ki TUHAN tua in kototabi bo moadil; ki Allah naton nopuḻing in tabi.

⁶Ki TUHAN in noḷukad kon intau mita inta moompá in gina; kon tungkuḷ in akuoi diádon mokopongonu pinosaḷamat-Nea in akuoi.

⁷Pinoodomku in ginaku, sin ki TUHAN in mopia kon inakó.

⁸Ki TUHAN in nopoḷuatdon kon inakó nongkon popatoi; iḻipoi-Nea in akuoi bo diá pinomayá-Nea mako in noḷabú.

⁹Dá akuoi in nobiagdon kon dunia naa, kon bonu in kawasa i TUHAN.

¹⁰Akuoi in umuranbí mopirisaya, umpaka in akuoi moguman, “Akuoi in totokdon in ná doroton.”

¹¹Kon bonu in kinotoboḻinguanku akuoi in noguman, “Diábí tobatúmai intau in motaau pirisayaan.”

¹²Onu in ogoiku kon i TUHAN sin potuḻí kon kopopia-Nea kon inakó?

¹³Akuoi in modiabí kon sosumba anggur kon i TUHAN sin mopoyaput in sukur popisí in totuḷung-Nea.

¹⁴Akuoi in mogintompodbí kon dandiku kon i-Nia kon tayowon in bayongan in umat-Nea.

¹⁵Ki TUHAN in totok in motabi kon kopatoian in intau inta kinotabi-Nea.

¹⁶Akuoi naa in mogogundoi-Mu, o TUHAN, naonda bo ki ináku, akuoi in mogundoi doman kon ini-Mu Iko in nopoḷuatdon kon inakó nongkon ponjara.

¹⁷Akuoi in modiadon kon kuruban sukur kon ini-Mu, sindaḷan mopoyaput in sambayang kon ini-Mu.

¹⁸Akuoi in mogintompodbí kon dandiku kon i TUHAN, kon tayowon in bayongan in umat-Nea

¹⁹inta noyosipun kon palas in Baḷoi TUHAN, kon yua-yuak in kotá in Yerusalem. Dayowdon in ki TUHAN!