Read Mongondow MAZMUR 118 Bible Online

MAZMUR 118 - Mongondow bible

MAZMUR 118

¹Posukurdon kon i TUHAN sin Sia in mopia, tabi-Nea in mononoi.

²Biódon mako intau in Israel in moguman, “Tabi-Nea in umuran mononoi.”

³Biódon mako imang mita in moguman, “Tabi-Nea in umuran mononoi.”

⁴Biódon mako bayongan in intau inta mopirisaya in moguman, “Tabi-Nea in umuran mononoi.”

⁵Kon bonu in rorigaku akuoi in nokuani kon i TUHAN; bo sinubagan-Nea poḷat pinoḷuat-Nea in akuoi.

⁶Akuoi in diábí moondok sin ki TUHAN in kotaki-takinku, intau in diábí mokopongonu kon inakó.

⁷Ki TUHAN in kotaki-takinku sin motuḷung kon inakó, akuoi in mokoontongbí kon musungku taḷowon.

⁸Mopia-piabí kon mosingayow kon i TUHAN, dika in mopongata kon intau.

⁹Mopia-piabí in mosingayow kon i TUHAN, dika in mongamang mako kon dodatuon.

¹⁰Mobayong in musung in noḻibut kon inakó; pinodoyon kon kawasa i TUHAN, sinaḷowku in mosia.

¹¹Mosia in nongopung kon inakó nongkon bayongan in tampat; pinodoyon kon kawasa i TUHAN, sinaḷowku in mosia.

¹²Naonda bo pasukan mosia in noḻibut kon inakó; pinodoyon kon kawasa i TUHAN, sinaḷowku in mosia, Tongá tokokiap monag piniyongan in mosia naonda bo tuḷú inta nomokak kon bo bonganga.

¹³Akuoi in totokbí in sinubu bo gogió moḷabú, táe ki TUHAN in notuḷung kon inakó.

¹⁴Ki TUHAN in pangkoi in ropotku bo kinoibo-ibogku, Sia in noposaḷamatdon kon inakó.

¹⁵Indongogaidon in giow kinountungan kon ḷoḷaigan mita in umat-Nea, “Ki TUHAN in nopoontongdon in kotorindog-Nea!

¹⁶Kawasa-Nea in nopountung kon inaton! Ki TUHAN in nopoontongdon in kotorindog-Nea.”

¹⁷Akuoi in diábí matoi, táe umuranbí mobiag sin mopotaa-taau mako kon aid i TUHAN.

¹⁸Ki TUHAN in totokdon in nopororiga kon inakó, táe diábí in akuoi inogoi-Nea kon popatoi.

¹⁹Pobukataidon in akuoi kon ḷoḻingkop in ngara in Baḷoi TUHAN, sinbá tumuot in akuoi bo mopoyaput in sukur kon i-Nia.

²⁰Naa in ḷoḻingkop in ngara i TUHAN, tongábí intau motuḻid in motaau mongintua.

²¹Akuoi in modayow kon ini-Mu, sin Iko in notubagdon kon sambayangku; pinountung-Mudon in akuoi.

²²Batu inta iḷumbú in mogogaid mita kon baḷoi, ain nobaḻí batu tongguḷunea.

²³Tuata in aid i TUHAN, totuu mokoherang kon inaton.

²⁴Naa in singgai inta sinantú i TUHAN; igai rameon naton takin ḷunganga in gina.

²⁵Poigumon nami, TUHAN, posaḷamatpa in kami, o TUHAN, pountungdon in kami!

²⁶Binarakatandon in sia inta namangoi pinodoyon kon tangoi TUHAN, barakatan nami in moiko nongkon Baḷoi TUHAN.

²⁷Ki TUHAN in ki Allah, Sia in mopia in gina kon inaton. Bayádon in muna moyotakin kokada-kadai in tanga, bo ḻibudon in mezbah i TUHAN.

²⁸Iko in ki Allahku, akuoi in mopoyaput in sukur kon ini-Mu. Allahku, akuoi in mopoḷantud kon ini-Mu.

²⁹Posukurdon kon i TUHAN sin Sia in mopia, tabi-Nea in umuran mononoi.