Read Mongondow MAZMUR 119 Bible Online

MAZMUR 119 - Mongondow bible

MAZMUR 119

¹Pia in kamang in intau inta nobiag diá in bogit bo notoindudui kon hukum mita i TUHAN.

²Pia in kamang in intau inta dinumudui kon parenta-Nea, bo takin ḻimbatú in gina moḷongasi monotaau kon i TUHAN.

³Pia in kamang in intau inta nobiag podudui in ibog i TUHAN, bo diá nogaid kon moraat.

⁴Iko in nobogoi kon inami in hukum-Mu, o TUHAN, sinbá aidan nami intua takin mokopotoḷutui.

⁵Igumon mako akuoi takin gina moroton dumudui kon atorang-Mu mita.

⁶Aka akuoi monaridimai kon bayongan in parenta-Mu, dá akuoi in diábí pokopooyáanmai.

⁷Aka balajaronku in pinononantú-Mu inta moadil, akuoi in modayow kon ini-Mu takin ḻimbatú in gina.

⁸Akuoi in moibogbí dumudui kon hukum-Mu, dikabí kaasí mokoimontanmai in monaḷámai kon inakó.

⁹Intau moguodpa in mokoḷukadbí kon kobiagannea diá in bogit aka mobiag in sia podudui in parenta-Mu.

¹⁰Takin ḻimbatú in gina akuoi moḷongasi monotaau kon ini-Mu, dikabí kaasí pomayá-Mu mako in akuoi in tumabat kon parenta-Mu.

¹¹Totundú in sinagúku kon bonu in ginaku, sinbá akuoi diá baradosaan kon ini-Mu.

¹²Akuoi in modayow kon ini-Mu, o TUHAN, tundúdon in akuoi in atorang-Mu.

¹³Noḷangon in singogku in nopotaau in bayongan in hukum inta inogoi-Mu.

¹⁴Noḷunganga in ginaku in dinumudui kon parenta-Mu mita, naonda bo nokouḻí kon bayongan in kapunyaan.

¹⁵Akuoi in moibog mobalajar kon bayongan inta sinantú-Mu, bo monaridi kon topotundú-Mu mita.

¹⁶Atorang-Mu in nokosanang kon inakó; totundú-Mu in diábí koḻionganku.

¹⁷Igumon mako mopia in gina-Mu kon mogogundoi-Mu naa, sinbá akuoi in umuran mobiag bo dumudui kon totundú-Mu.

¹⁸Bukádon in mataku sinbá mokoontong in akuoi kon totundú inta mokotongaw kon bonu in hukum-Mu.

¹⁹Diábí umuran mako in akuoi in mogutun kon dunia dikabí kaasí bunion in hukum-Mu kon inakó.

²⁰Monakit in ginaku in monahang kon tanob, akuoi in moibog monotaau kon hukum-Mu pomuḷoi mako.

²¹Iko in monoboḷow kon intau inta moḷoḷatú, bo nongutuk kon intau inta sinumabat kon parenta-Mu.

²²Poḷuatdon in akuoi kon singkuḻe bo rebeg monia, sin akuoi in nopobayá in atorang-Mu.

²³Umpakabí pongawasa mita moyopopog in monayow kon inakó, mogogundoi-Mu naa in umuranbí monano-nanob mako kon atorang-Mu.

²⁴Atorang-Mu mita in nobaḻí mononongginaku inta nokosanang kon ginaku.

²⁵Akuoi in inumuḻid mako kon ruak in ḷobud; poguḻídon in kobiaganku podudui in dandi-Mu.

²⁶Inakuku in aidku, bo Iko in notubag kon inakó; tundúdon kon inakó in atorang-Mu.

²⁷Tuḷungaidon in akuoi monotaau kon hukum-Mu mita, totundú-Mu [66] inta mokotongaw in umuranku tano-tanobon.

²⁸Dimukudku in morumbun sin kinoantugan in susa, iropotaidon in akuoi podudui in dandi-Mu.

²⁹Poyayúdon in akuoi nongkon daḷan inta mokopoḷaḻe, popisí in kopopia-Mu, yo tundú kon inakó in hukum-Mu.

³⁰Piniḻíkudon kon motoindudui, parenta-Mu in umuran toroponku mako.

³¹Akuoi in dinumuduidon kon atorang-Mu mita, o TUHAN, dika pomayá mako in akuoi in pokooyáanmai.

³²Takin pia in gina dumudui in akuoi kon parenta-Mu, sin binaḻí-Mu in akuoi totok in momangaḻe.

³³TUHAN, tundúdon kon inakó in mangaḻe in atorang-Mu mita, sinbá dumudui in akuoi modapot in kopaḷutannea.

³⁴Popomangaḻedon kon inakó in hukum-Mu sinbá duduianku, bo aidanku takin ḻimbatú in gina.

³⁵Igumon mako akuoi in umuran kumadai totok kon parenta-Mu, sin tuabí in kinoibogku.

³⁶Ogoiaidon in akuoi in ibog dumudui kon atorang-Mu, moiḻiu kon ibog mobaḻí mooyúon.

³⁷Ḷukadai in akuoi sinbá diá momatuk kon inta diá in mangaḻenea, ogoiaidon in akuoi in kobiagan podudui in ibog-Mu.

³⁸Popogonúdon totok kon mogogundoi-Mu naa in dandi-Mu, inta ogoi-Mu kon intau inta motoḷutui kon ini-Mu.

³⁹Poyayúdon in singkuḻe inta kinoondokku, sin totuubí kon mopia in hukum-Mu.

⁴⁰Ogoiaidon in akuoi in kobiagan mobagu, sin Iko in moadil, totokbí in ibogonku in tumoḷutui kon atorang-Mu mita.

⁴¹O TUHAN, poontongdon kon totuu motabi in Iko kon inakó, posaḷamatpa kaasí in akuoi podudui in dandi-Mu.

⁴²Dá mokotubagdon in akuoi kon intau inta moningkuḻe kon inakó, sin akuoi in mopongata in tosingogon-Mu.

⁴³Tuḷungaipa kaasí in akuoi sinbá umuran mosingog kon onu in totuu, sin akuoi in mogoḷat mako kon onu in tantúon-Mu.

⁴⁴Akuoi in moibog kumadai kon hukum-Mu, modapot in mononoi.

⁴⁵Dá mobiagdon in akuoi takin diá in ḷamboinea, sin moḷongasi dumudui kon totundú-Mu.

⁴⁶Atorang-Mu in potaaukubí kon datu mita, bo diábí in akuoi mooyá.

⁴⁷Inta mokoḷunganga kon inakó in mopobayábí in parenta-Mu, sin kinoibogku totok intua.

⁴⁸Horomatonku bo koibogku in parenta-Mu, atorang-Mu in umurankubí tano-tanobon.

⁴⁹Toropdon in dandi-Mu kon mogogundoi-Mu tanaa, dandi inta mobogoi in kamang kon inakó.

⁵⁰Naa inta mokoḻipoi kon inakó kon tungkuḷ in akuoi mororiga, sin dandi-Mu tatua in nobogoi in kobiagan kon inakó.

⁵¹Intau moḷoḷatú in totokbí in moningkuḻe kon inakó, táe akuoi in diábí sinumabat kon hukum-Mu.

⁵²Kinotoropankubí in hukum-Mu inta oyúon nongkon dungkuḷpabímai, dá noḻipoidon in ginaku, o TUHAN.

⁵³Akuoi in sinumorúdon totok kon intau moraat, sin mosia in nonaḷámai kon hukum-Mu.

⁵⁴Kinoouput in kobiaganku inta motoyong naa kon dunia, atorang-Mu in baḻíonku dondong mita dodayow.

⁵⁵Kon dodai in doḷom kotoropanku in Iko, o TUHAN, hukum-Mu in umuranbí kadaianku.

⁵⁶Akuoi in nokouḻí kon ḷunganga in gina kon bonu in sinumoḷutui kon parenta-Mu mita.

⁵⁷Tongábí Iko tontaní in koibogku, o TUHAN, akuoi in modandi kon mogaid kon onu in sinundú-Mu.

⁵⁸Takin ḻimbatú in gina akuoi mopoigum in totabi-Mu, kotabipa kaasí in akuoi podudui in dandi-Mu.

⁵⁹Akuoi in norai-raimaidon kon dodiaku, bo nodandi kon dumuduibí kon atorang-Mu.

⁶⁰Akuoi in ḻimikatbí bo diábí mogoḷat sin mopobayá in parenta-Mu.

⁶¹Intau moraat motaan kon potait kon inakó, táe akuoi in diábí mokoḻiong kon hukum-Mu.

⁶²Moonggot kon doḷom mobangon in akuoi sin modayow kon ini-Mu, popisí in pononantú-Mu mita inta moadil.

⁶³Akuoi in noyobayat in bayongan in intau inta motoguondok, bayongan in intau inta nogaid kon parenta-Mu,

⁶⁴Butá nopuḻing in tabi-Mu, o TUHAN, tundúdon kon inakó in atorang-Mu mita.

⁶⁵Iko in nogintompodon kon dandi-Mu, o TUHAN, bo nopoaid in inta mopia kon mogogundoi-Mu.

⁶⁶Ogoiaidon in akuoi in hikmat bo totaau, sin akuoi in mopirisaya kon parenta-Mu mita.

⁶⁷Kon dodai in diápa ihukum, akuoi in sinumabat, tanaa in akuoi kinumadai kon parenta-Mu.

⁶⁸Sin Iko in mopia bo nopoaid in mopia, tundúai in akuoi in atorang-Mu mita.

⁶⁹Intau moḷoḷatú noningkuḻe kon inakó, táe noḻimbatúbí in ginaku in sinumoḷutui kon atorang-Mu.

⁷⁰Intau mita tatua in diábí nomangaḻe, táe kon inakó hukum-Mu in mokosanangbí kon gina.

⁷¹Totuubí kon mopiabí in Iko in nohukum kon inakó, sinbá kotaauankudon in atorang-Mu mita.

⁷²Kon inakó in hukum-Mu in mopia-pia nongkon bayongan in buḷawan bo saḷaka kon dunia.

⁷³Ikobí in nomaḻí bo nomia kon inakó, ogoiaidon in akuoi in pomomangaḻe sin mobalajar kon parenta-Mu mita.

⁷⁴Intau motoguondok in mosanangbí in ginanea aka mokoontong kon inakó, sin akuoi in mogoḷat mako kon dandi-Mu.

⁷⁵Kinotaauanku kon pinononantú-Mu in moadil o TUHAN, Iko in nohukumdon kon inakó popisí in kososatia-Mu.

⁷⁶Igumon mako tabi-Mu in nobaḻí ḷoḻipoiku, podudui in dandi-Mu kon mogogundoi-Mu.

⁷⁷Kotabipa kaasí in akuoi, dá umuran mobiag in akuoi, sin hukum-Mu in mokosanang kon ginaku.

⁷⁸Biódon mako in intau moḷoḷatú mooyá popisí in noponapudon in uboḷ kon inakó, táe akuoi in umuranbí monano-nanob kon parenta-Mu mita.

⁷⁹Igumon mako intau inta motoguondok mamangoi kon inakó, bayongan inta nonotaau kon atorang-Mu mita.

⁸⁰Igumon mako in ginaku diá tumabat nongkon atorang-Mu, sinbá diá mooyá in akuoi.

⁸¹Ginaku in totokbí in mokotanob kon kasaḷamatan nongkon ini-Mu; akuoi in mogoḷat mako kon dandi-Mu.

⁸²Mataku moḷopí in mogoḷat mako kon ini-Mu mogintompod kon dandi-Mu, akuoi in noguman, “Toonubí degá in Iko in moḻipoi kon inakó?”

⁸³Kuḻitku in noḷubakdon naonda bo botutu in anggur inta ain nokoyongan, táe atorang-Mu in diábí koḻionganku.

⁸⁴Modapot in toonu kaasí in mogogundoi-Mu naa in musti mokopoigon kon gina? Toonu degá in Iko in mohukum kon intau mita inta nondudur kon inakó?

⁸⁵Intau inta diá dinumudui kon hukum-Mu, nongaḻidon kon bubú sinbá kotopakanku.

⁸⁶Bayongan in hukum-Mu in motaaubí pongata, tuḷungaipa kaasí in akuoi, sin akuoi in dinuduran táe diábí in kinodoyonan pinonduduran.

⁸⁷Gogió bo kinoḻimodandon monia in akuoi, táe diábí sinaḷáankumai in parenta-Mu.

⁸⁸Posaḷamatpa in akuoi sin Iko in umuranbí motabi kon inakó, sinbá akuoi in mokoduduidon kon hukum-Mu.

⁸⁹TUHAN, tosingogon-Mu in moroton modapot in kopaḷutannea, umuran mononoi kon soroga.

⁹⁰Kososatia-Mu in monahang kino ouput in wakutu, Pinotorindog-Mu in butá nodapot in umuran oyúon.

⁹¹Bayongan inta oyúon tanaa mako, oyúon popisí in parenta-Mu, sin mosia in mogogundoi-Mubí mita.

⁹²Aka kuma bo hukum-Mu in deemanbí pinomangkoian in ḷungangaku, yo notantúbí kon minatoidon in akuoi kon bonu in rorigaku.

⁹³Modapotbí in mononoi in akuoi in diá monaḷámai kon parenta-Mu, sin tuabí in pinomiag-Mu kon inakó.

⁹⁴Posaḷamatdon kaasí in akuoi, sin akuoi naa Iko in kitogi, akuoi in noḷongasidon dinumudui kon atorang-Mu.

⁹⁵Intau moraat in mogoḷat mako sin moḻimod kon inakó, táe akuoi in moibogbí monaridimai kon hukum-Mu.

⁹⁶Inontongku kon inta notompodpa in oyúonbí in sigadnea, tongábí parenta-Mu in nosompurna.

⁹⁷Totokbí in koibogku in hukum-Mu; umurankubí tano-tano bo kinoouput in singgai.

⁹⁸Umurankubí kotoropan in parenta-Mu, inta nokodugang kon kobobijaksanaku nongkon musungku mita.

⁹⁹Komomangaḻeku in noiḻiu kon komomangaḻe in guruku mita, popisí in akuoi umuran monano-nanobmai kon parenta-Mu mita.

¹⁰⁰Akuoi in motaa-taau in guyanga mita, sin akuoi in kinumadai kon atorang-Mu mita.

¹⁰¹Iyumayú in akuoi kon bayongan in dodia, moraat, sinbá motoḷutui in akuoi kon totundú-Mu.

¹⁰²Diábí pomayáku mako in hukum-Mu, sin Ikobí in notundú kon inakó.

¹⁰³Totuu mopia in tosingogon-Mu, noiḻiu kon koromimit in biluk!

¹⁰⁴Hukum-Mu mita in nobogoi kon inakó in pomomangaḻe, dá doíbí in akuoi kon aid motombogá.

¹⁰⁵Tosingogon-Mu in nobaḻí togá kon bayáanku, sindar inta monimbayag kon daḷanku.

¹⁰⁶Inta dinandiku pinodoyon kon ibot in intompodankubí, kon kumadai kon atorang-Mu inta moadil.

¹⁰⁷Akuoi in totokbí in mororiga, o TUHAN, ḷukadai in kobiaganku podudui in dandi-Mu.

¹⁰⁸Tarimapa kaasí in sambayang sukurku, o Tuhan, bo tundúdon in akuoi in hukum-Mu mita.

¹⁰⁹Akuoi in umuranbí moposarakan in kobiaganku, táe akuoi [67] diábí mokoḻiong kon hukum-Mu.

¹¹⁰Intau moraat in motaan kon poyogaḷap kon inakó, táe akuoi in diábí sinumabat kon atorang-Mu.

¹¹¹Parenta-Mu in bongkoḷku modapot in mononoi, inta nokoḷunganga kon ginaku.

¹¹²Totokbí in kon ginaku in dumudui kon atorang-Mu, modapot in mopaḷut in kobiaganku.

¹¹³Akuoi in moibog totok kon hukum-Mu mita, kinodoíku in intau inta diá noḻimbatú in gina in dumudui kon ini-Mu.

¹¹⁴Ikobí in mododuḷu bo mogogoḻingoiku, akuoi in mogoḷat mako kon dandi-Mu.

¹¹⁵Ei intau moraat, pokoyayúdon kon inakó! Akuoi in moibogbí tumoḷutui kon parenta i Allahku.

¹¹⁶Iropotai in akuoi podudui in dandi-Mu sinbá mobiag in akuoi, dika pomayá mako in akuoi in pokudaion kon bonu in akuoi nongamang.

¹¹⁷Tonoidon in akuoi sinbá mosaḷamat in akuoi, bo umuran moindoimai kon parenta-Mu.

¹¹⁸Iko in doíbí kon intau inta sinumabat kon atorang-Mu, diábí in mangaḻe in tombuḻitok monia.

¹¹⁹Bayongan in intau moraat in inanggapkubí yoyatan, tuamai in akuoi in moibog kon atorang-Mu mita.

¹²⁰Akuoi in mourot popisí in moondok kon ini-Mu, ginaku in moondok kon atorang-Mu.

¹²¹Akuoi in nogaidon kon inta moadil bo inta noitutui, dikabí kaasí ogoi in akuoi kon kawasa in musung.

¹²²Podandidon kon Iko in motuḷungbí kon inakó, dikabí pomayá mako in akuoi in doroton in intau mita mododia.

¹²³Mataku in mopomporí in mogoḷat mako kon totuḷung-Mu inta mokosaḷamat, inoḷatku mako in popoḷuatan inta pinodandi-Mu.

¹²⁴Popoaidon kon inakó podudui in tabi-Mu, bo tundúdon kon inakó in atorang-Mu.

¹²⁵Akuoi in mogogundoi-Mu, baḻídon in akuoi momangaḻe, sinbá komangaḻeanku in parenta-Mu.

¹²⁶TUHAN, wakutu-Mudon mopobayá in oaidan-Mu, sin intau mita iḻimimpatdon kon hukum-Mu.

¹²⁷Parenta-Mu mita in kinoibogku totok noiḻiu kon buḷawan taakan.

¹²⁸Tuamai akuoi in nobiag podudui in bayongan topotundú-Mu; dodia inta mobelung in kinodoíku.

¹²⁹Atorang-Mu mita in totuu kon mokotongaw, dá dinuduianku takin ḻimbatú in gina.

¹³⁰Aka insilangan, totundú-Mu in mobogoi in bayag, mobogoi in pomomangaḻe kon intau moompá in gina.

¹³¹Poginaanku in mopoina-inak, popisí in mokotanob kon parenta-Mu.

¹³²Bobuidon in akuoi bo kotabipa kaasí in akuoi, ná kototabi-Mu kon intau inta motabi kon ini-Mu.

¹³³Irigonaidon in ḷampangku podudui in dandi-Mu, dikabí pomayá mako kaasí in akuoi in kawasaan in moraat.

¹³⁴Poḷuatdon in akuoi nongkon intau mita inta mondorot kon inakó, sinbá akuoi in mokotoinduduidon kon atorang-Mu.

¹³⁵Barakataidon in akuoi podoyon kon koangoian-Mu, bo tundúdon in akuoi in atorang-Mu.

¹³⁶Ḷuáku in moiḻig naonda bo ongkag, popisí in hukum-Mu diá dinuduian.

¹³⁷Iko in moadil, o TUHAN, bayongan in hukum-Mu in noitongkaná.

¹³⁸Parenta mita inta inogoi-Mu in moadil bo motaau pongata.

¹³⁹Torúku in modokot kon bonu in ginaku popisí in musungku nokoḻiong kon totundú-Mu.

¹⁴⁰Dandi-Mu in motorindog bo motaau pirisayaan, totok in moibog in akuoi intua.

¹⁴¹Akuoi naa in mointok bo noempeng, táe diábí sinaḷáanku in totundú-Mu.

¹⁴²Kooadil-Mu in umuran mononoi, hukum-Mu in umuranbí mobanar.

¹⁴³Akuoi in kinoantugan in roriga bo susa, Táe atorang-Mu in mokoḷunganga kon ginaku.

¹⁴⁴Atorang-Mu in umuran moadil; ogoiai in akuoi in pomomangaḻe sinbá mobiag in akuoi.

¹⁴⁵Takin ḻimbatú in gina akuoi mokuani kon ini-Mu; tubagaipa kaasí in akuoi o TUHAN, akuoi in moibog dumudui kon parenta-Mu.

¹⁴⁶Akuoi in nokuani kon ini-Mu, posaḷamatpa kaasí in akuoi, akuoi in moibog kumadai kon atorang-Mu.

¹⁴⁷Doḷo-doḷom mobangon in akuoi bo mokuani mokituḷung; akuoi in mogoḷat mako kon dandi-Mu.

¹⁴⁸Kinoouput in doḷom moḷukad mako in akuoi, sin monano-nanob kon totundú-Mu.

¹⁴⁹Indongogaidon in akuoi popisí in tabi-Mu o TUHAN, ḷukadaipa kaasí in kobiaganku popisí in kooadil-Mu.

¹⁵⁰Intau inta mondudur kon inakó in nodiugdon, niat monia in moraat bo diábí nopandungmai kon hukum-Mu.

¹⁵¹Táe Iko in nodiug, o TUHAN, bayongan in parenta-Mu in totuu.

¹⁵²Nongkon koḻipodpabímai kinotaauanku nongkon totundú-Mu mita, kon Iko in nonantúdon kon tua modapot in mononoi.

¹⁵³Indoiaipa kaasí in rorigaku bo posaḷamatpa in akuoi, sin diábí sinaḷáanku in hukum-Mu.

¹⁵⁴Duḷuaidon in pelekaraku bo poḷuatdon in akuoi; posaḷamatpa in akuoi podudui in dandi-Mu.

¹⁵⁵Intau moraat in diábí posaḷamaton, popisí in diá dinumudui kon atorang-Mu.

¹⁵⁶Totuu moḷoben in totabi-Mu, o TUHAN, posaḷamatpa in akuoi podudui in kooadil-Mu.

¹⁵⁷Nobayong in intau in nosaturu bo nondudur kon inakó, táe diábí sinaḷáanku in parenta-Mu.

¹⁵⁸Moyaatbí in ginaku in mokoontong kon momomaḻidawan mita tatua, sin mosia tua in diábí dinumudui kon totundú-Mu.

¹⁵⁹Indoiaika dá totokbí in akuoi moibog kon parenta-Mu, o TUHAN, posaḷamatpa kaasí in akuoi podoyon kon tabi-Mu.

¹⁶⁰Bayongan in tosingogon-Mu in totuubí, bayongan in hukum-Mu inta moadil tatua in umuranbí mononoi.

¹⁶¹Intau mita inta kokawasa nondudur kon inakó takin diábí in kinodoyonannea, táe tongábí hukum-Mu in koondokku.

¹⁶²Dandi-Mu in nokosanang kon ginaku, naonda bo intau inta nokouḻí kon kapunyaan.

¹⁶³Bayongan in uboḷ kinodoíku, táe hukum-Mu in kinoibogku.

¹⁶⁴Akuoi in tantúbí mopoyaput in sukur kon ini-Mu, sin hukum-Mu inta moadil.

¹⁶⁵Intau inta moibog in hukum-Mu in moaman bo moodom, diábí in mokoḷamboi kon i monia.

¹⁶⁶Akuoi in mogoḷat mako kon kasaḷamatan nongkon ini-Mu, TUHAN, parenta-Mu mita in inaidanku.

¹⁶⁷Akuoi in notoindudui kon atorang-Mu mita, bo noibog kon inia takin ḻimbatú in gina.

¹⁶⁸Akuoi in dinumudui kon parenta bo topotundú-Mu, sin inontong-Mu in bayongan in aidku.

¹⁶⁹Igumon mako kuaniku modapot kon ini-Mu, o TUHAN, ogoiaidon in akuoi in pomomangaḻe, podudui in dandi-Mu.

¹⁷⁰Biódon mako in oigumku modapot kon ini-Mu, posaḷamatpa in akuoi podudui in dandi-Mu.

¹⁷¹Akuoi in moibog umuran modayow kon ini-Mu, sin Iko in notundú kon atorang-mu.

¹⁷²Akuoi in moibog mopodondong soaḷ dandi-Mu, sin bayongan in parenta-Mu in moadil.

¹⁷³Igumon mako Iko in umuran moibog motuḷung kon inakó, sin sinantúkudon kon dumudui kon atorang-Mu.

¹⁷⁴Ginaku in mokotanob kon kasaḷamatan nongkon ini-Mu, hukum-Mu in mokosanang kon ginaku.

¹⁷⁵Biódon mako akuoi in mobiag, sinbá akuoi in modayow kon ini-Mu, igumon mako atorang-Mu mita motuḷung kon inakó.

¹⁷⁶Akuoi in noiḷangkam naonda bo domba inta nobuḻi, tuamai in angoidon, bo tayakdon in mogogundoi-Mu naa, sin diábí sinaḷáanku in parenta-Mu mita.