Read Mongondow MAZMUR 12 Bible Online

MAZMUR 12 - Mongondow bible

MAZMUR 12

¹Kon i itoi in mododondong. Podudui in dondong inta in waḷunea. Mazmur i Daud.

²Tuḷungaipa kaasí in kami, o TUHAN, sin diádon in intau mopia, intau inta mosatia kon ini-Mu ain noyopú.

³Mosia komintan mosiuboḷandon, mosiakaḷan pongin tosingogon inta mopia in kodongogan.

⁴Popogogaidon in tosingogon mita inta modondouḷug tua, TUHAN, tukumaidon in intau mita inta moambungangaḷ,

⁵inta moguman, “Kami in mongawasa takin dilá nami! Onukabí motaaubí singogon nami, bo diábí in mokoḷamboi!”

⁶Guman i TUHAN, “Intau nobiag nobogá doroton bo intau mororiga mogamui. Dá tanaa doman Akuoi in namangoi mobogoi in kobiagan moodom inta kinoibog monia.”

⁷Dandi i TUHAN moroton bo motaau pongata, naonda bo saḷaka taakan inta inuji kon bonu in tuḷú.

⁸Intau moraat modondaḷoi magí-mako, aid moraat duíon in bayongan in intau. Táe Iko in moḷukad kon inami, o TUHAN, ḷukadaipa in kami nongkon intau mita inta moraat tatua.