Read Mongondow MAZMUR 124 Bible Online

MAZMUR 124 - Mongondow bible

MAZMUR 124

¹Dondong i Daud kon dodai in mayá in Baḷoi TUHAN. Naonda degá aka kuma bo ki TUHAN diá dumotá kon i naton? Ei Israel, tubagaidon nanaa:

²“Aka kuma bo ki TUHAN diá dumotá kon i naton kon tungkuḷ in kita tubuon in musung,

³dá kita in iḻiom bidon ande sibiag, popisí in torú monia inta tumaga-tagabdon tua.

⁴Dá kita in iniḻigdon in ḷunud, bo sinagom in tubig;

⁵bo kita in minatoidon noḷomot kon ponangkaburowan in tubig inta mokoondok.”

⁶Igai in kita mopoyaput in sukur kon i TUHAN, sin diábí pinomayá-Nea mako in kita iyopú in musung.

⁷Kita in naonda bo ḷagapan inta nokobuḻi nongkon giman in mongonggiman, goguḷu tatua in nobontowdon, bo kita in nokobuḻidon!

⁸Totuḷung naton in namangoi nongkon i TUHAN inta nomaḻí kon ḷangit bo butá.