Read Mongondow MAZMUR 127 Bible Online

MAZMUR 127 - Mongondow bible

MAZMUR 127

¹Dondong i Salomo. Aka deeman ki TUHAN in noposindog in baḷoi, yo diábí in mangaḻe in mogogimoknea mita mogaid. Aka deeman ki TUHAN in moḷukad kon kotá, yo diábí in mangaḻe in poḷukadan in moḷoḷukad.

²Diábí in mangaḻenea in simiḷopí totok in mogaid motayak kon kobiagan, mobangon doḷo-doḷom bo mosiug moonggot kon doḷom; sin ki TUHAN in moposadiabí kon i monia inta kinotabi-Nea, kon tungkuḷ in mosia mosiugpa mako.

³Adí mita in ki Allahbí in nobogoi, totuubí kon mosia tua in totabibí.

⁴Adí mita ḷoḷaki inta nouḻí kon dodai in nobagupa naonda bo piot kon ḻima in momomiot.

⁵Pia in kamang totok in intau inta oyúon in tongkaaḷ piot mita ná tatua! Sia in diábí taḷowon, kon dodai in moyogintayow in musung kon pongadilan.