Read Mongondow MAZMUR 132 Bible Online

MAZMUR 132 - Mongondow bible

MAZMUR 132

¹Dondong mayá in Baḷoi TUHAN. O TUHAN, toropdon in ki Daud, bo bayongan in roriganea.

²Dikabí kaasí koḻiongan in sumbanea kon ini-Mu TUHAN, bo dandinea kon ini-Mu Inta Totok in moropot, Allah i Yakub.

³Gumannea, “Akuoi in diábí mogogai kon baḷoiku andeka mosiug kon tosiuganku,

⁵kon dodai in diápa moposadia in baḷoi kon i Allah i Yakub, pogogutunan i TUHAN Inta Totok in Moropot.”

⁶Kon Betlehem dinongog naton soaḷ Poti Dodandian, bo nouḻí kon rawang in Yaar.

⁷Igai mayá in kita kon tampat pogogutunan i TUHAN, bo mosumba kon i-Nia kon tayowon in pomomarentaan-Nea.

⁸Angoidon bo pogutundon kon Baḷoi-Mu, o TUHAN, moyotakin in Poti Dodandian, tomponuot in kawasa-Mu.

⁹Igumon mako in umat-Mu monggiow pia in gina, bo imang-Mu mita in umuran mobiag podudui in ibog-Mu.

¹⁰Podoyon kon i Daud mogogundoi-Mu, dika kaasí indoíon in datu inta piniḻí-Mu.

¹¹Ki TUHAN in nongibotdon kon i Daud; Sia in diábí monginggamá kon dandi-Nea. Guman-Nea, “Ki adímu tobatú in baḻíon-Kubí datu sin momarenta monoḻiu kon inimu.

¹²Aka ki adímu mita motoḷutui kon dodandian-Ku, bo motoindudui kon parenta-Ku mita, dá modapot in mononoi buí monia in monoḻiu kon ini-Mu mobaḻí datu.”

¹³Sin ki TUHAN in nomiḻídon kon Sion; Kinoibog-Nea mobaḻí tampat pogogutunan-Nea.

¹⁴Guman-Nea, “Kon tanaaya in pogogutunan-Ku modapot in mononoi, Akuoi in moibog momarenta kon tampat tanaa.

¹⁵Bayongan in kaparaḷuannea in ogoi-Kubí kobayongon, intaunea mita inta nobogá in pokaanon-Kubí modapot in mobotug.

¹⁶Imangnea mita in mopoontongbí in kasaḷamatan nongkon i-Nakó; umatnea in modondongbí bo monggiow pia in gina.

¹⁷Kon naa buí i Daud tobatú in baḻíon-Kubí datu; pomomarentaannea in irigonan-Kubí.

¹⁸Dodatuannea in umuranbí mobiag mooyúon, táe musungnea mita in pokopooyáanbímai.”