Read Mongondow MAZMUR 135 Bible Online

MAZMUR 135 - Mongondow bible

MAZMUR 135

¹Dayowdon in ki TUHAN! Dayowdon in tangoi TUHAN, ei moiko mogogundoi-Nea mita

²inta nogundoi kon Baḷoi TUHAN kon pinogutunan i Allah naton.

³Dayowdon in ki TUHAN, sin Sia in mopia, dayowdon in tangoi-Nea, sin Sia in mopia in gina. [70]

⁴Ki Yakub in piniḻí-Nea kon i-Nia, umat in Israel binaḻí kapunyaan-Nea.

⁵Sin kinotaauanku kon ki TUHAN in totuubí kon moḷoben, Sia in moḷantud noiḻiu kon bayongan in dewa.

⁶Sia in nogaid kon onu in kinoibog-Nea, kon ḷangit bo kon butá, kon dagat bo kon baḷangon inta modaḷom.

⁷Nongkon popod in butá Sia nopoangoi in goḷom, pinomia-Nea in kilat kon uyan. Bo pinarentaan-Nea in tompot sinbá ḷumuai nongkon tampat pinotagúan-Nea.

⁸Kon Mesir Sia in noḻimod kon bayongan in adí guya-guyang pinangkoi kon intau nodapot in bobiagon.

⁹Kon tua nobayong in inaidan-Nea in mokoherang bo tomponuot sin mohukum kon datu bo bayongan in pogawainea,

¹⁰Sia in noyopú kon nobayong in bangusa, bo noḻimod kon datu mita inta mongotorindog:

¹¹ki Sihon datu in Amori bo ki Og datu in Basan, bo bayongan in datu kon Kanaan.

¹²Bo butá monia in inogoi-Nea nobaḻí kapunyaan in Israel, umat-Nea.

¹³O TUHAN, Iko in umuranbí potaa-taau mako, bo tangoi-Mu in sinorop in bayongan in buí,

¹⁴sin Iko in nobogoidon in inta moadil kon umat-Mu, bo nonotabi kon mogogundoi-Mu mita.

¹⁵Berhala monia in nongkon buḷawan bo saḷaka, mia in intau.

¹⁶Mosia in kobibig, táe diábí mokosingog, oyúon in mata, táe diá mokoontong.

¹⁷Mosia in kobongoḷan, táe diá mokodongog, nongkon bibignea diábí ḷumuai in tompot poginaan.

¹⁸Igumon mako natua in ukur in intau mita inta nomia kon tua, bo inta mopirisaya kon inia.

¹⁹Dayowdon in ki TUHAN, ei umat in Israel, dayowdon in Sia, ei imang mita i Allah!

²⁰Dayowdon in ki TUHAN, ei intau mita in Lewi, dayowdon in Sia, moiko komintan inta motoguondok.

²¹Dayowdon in ki TUHAN kon Sion, kon Yerusalem tampat pinogutunan-Nea. Dayowdon in ki TUHAN!