Read Mongondow MAZMUR 136 Bible Online

MAZMUR 136 - Mongondow bible

MAZMUR 136

¹Posukurdon kon i TUHAN, sin Sia in mopia; tabi-Nea dapot in mononoi.

²Posukurdon kon i Allah Inta totok in Moḷantud; tabi-Nea in umuran mononoi.

³Posukurdon kon i TUHAN Inta totok in Moḷoben; tabi-Nea in umuran mononoi.

⁴Tongábí Sia in mogaid kon inta mokoherang mita moḷoben; tabi-Nea in umuran mononoi.

⁵Pinongin kobobijaksana-Nea Sia in nomaḻí kon ḷangit; tabi-Nea in umuran mononoi.

⁶Inukat-Nea in butá kon tudu in tubig; tabi-Nea in umuran mononoi.

⁷Sia in nomia kon pakakat mita ponimbayag kon ḷangit; tabi-Nea in umuran mononoi;

⁸mata in singgai mongawasa kon singgai; tabi-Nea in umuran mononoi;

⁹buḷan bo tundi inta mongawasa kon doḷom; tabi-Nea in umuran mononoi.

¹⁰Iḻimod-Nea in adí mita guya-guyang in Mesir; tabi-Nea in umuran mononoi.

¹¹Israel in inatod-Nea iḻumuai nongkon Mesir; tabi-Nea in umuran mononoi;

¹²pinongin ḻima inta moropot bo motorindog; tabi-Nea in umuran mononoi.

¹³Dagat in Gelagah binotak-Nea; tabi-Nea in umuran mononoi;

¹⁴Israel umat-Nea in dinia-Nea pinoḷoḷan; tabi-Nea in umuran mononoi.

¹⁵Táe datu in Mesir bo tontaranea in iḷomot-Nea; tabi-Nea in umuran mononoi.

¹⁶Dinia-Nea in umat-Nea nongin padang gurun; tabi-Nea in umuran mononoi.

¹⁷Sinaḷow-Nea in datu mita inta mongotorindog; tabi-Nea in umuran mononoi;

¹⁸iḻimod-Nea in datu mita inta ponango-nangoian; tabi-Nea in umuran mononoi.

¹⁹Ki Sihon, datu in Amori; tabi-Nea in umuran mononoi;

²⁰bo ki Og, datu in Basan; tabi-Nea in umuran mononoi.

²¹Butá monia in inogoi-Nea kon umat-Nea; tabi-Nea in umuran mononoi;

²²mobaḻí kapunyaan in Israel mogogundoi-Nea; tabi-Nea in umuran mononoi.

²³Sia in diábí nokoḻiong kon i naton kon tungkuḷ in kita sinaḷow; tabi-Nea in umuran mononoi.

²⁴Pinoḷuat-Nea in kita nongkon kawasa in musung; tabi-Nea in umuran mononoi.

²⁵Kon batúan in inta nobiag inogoian-Nea in kaanon; tabi-Nea in umuran mononoi.

²⁶Posukurdon kon i Allah inta nongawasa kon ḷangit; tabi-Nea in umuran mononoi.