Read Mongondow MAZMUR 139 Bible Online

MAZMUR 139 - Mongondow bible

MAZMUR 139

¹Kon i itoi in mododondong. Mazmur i Daud. O TUHAN, kinodoḷopan-Mu in ginaku bo kinotaauan-Mu in akuoi.

²Kinotaauan-Mu in bayongan in aidku; nongkon noyayú kinomangaḻean-Mu in raianku.

³Inontong-Mu in akuoi, pinomayá akuoi nogaid andeka nogogai, Kinotaauan-Mubí in bayongan inta pinomiaku.

⁴Nodapot in diápa akuoi nosingog, kinotaauan-Mu onu in singogonku.

⁵Iḻibu-Mu in akuoi nongkon bayongan in tampat, bo iḷukadan-Mu in akuoi in kawasa-Mu.

⁶Moiḻiu in ako kon inakó in sinotaau-Mu tatua, diábí kogawadan in raianku.

⁷Kon onda in bayáanku sinbá moisimparut kon kawasa-Mu? Kon onda in motaau poḷaguianku yumayú kon tayowon-Mu?

⁸Aka akuoi mamonik in ḷangit, kon tua in Iko, aka akuoi mosiug kon dunia in popatoi, yo kon tua doman in Iko.

⁹Aka akuoi ḷumayug mongin pomukaan andeka kibio-biómai kon popod in toyopan inta totok in moyayú,

¹⁰Kon tua doman Iko in motuḷung kon inakó; kon tua doman in ḻima-Mu mokapit kon inakó.

¹¹Aka poigumonku sinbá sindip moikoḷubung kon inakó, bo bayag kon diugkumai mobaḻí modoḷom,

¹²yo doḷom tatua in diábí mokosindip kon ini-Mu; doḷom tatua in mobayag naonda bo singgai, bo sindip tatua in naonda bo bayag.

¹³Iko in nomaḻí kon batúan in awakku, bo nomia kon inakó kon bonu in bobuḷadían i ináku.

¹⁴Akuoi in modayow kon ini-Mu sin akuoi in diá in poḻiuan! Bayongan in aid-Mu in mokoherang bo mokotongaw, totokbí in kinotaauanku intua.

¹⁵Kon tungkuḷ in tuḷanku mita pinomia, takin pandoi pinipid kon bonu in bobuḷadían i ináku, kon dodai in akuoi nobiag noiadop kon tua, akuoi in diábí noiadop kon ini-Mu.

¹⁶Iko in nokoontongbí kon inakó kon tungkuḷ in akuoi kon bonupa in bobuḷadían; komintanbí pinais kon bonu in buk-Mu; singgainea mita in sinantú bidon kon tungkuḷ in diápa tobatúmai in pinangkoi.

¹⁷Totuu moyoyiga [71] raian-Mu kon inakó, o Allah, bo totuubí mobayong in koantónea!

¹⁸Aka iyaponku, yo mobayo-bayong bí kon bungaion; aka akuoi mobangon, umuranpabí doman raionkumai in Iko.

¹⁹Igumon mako intau moraat yompaton-Mu, o Allah, poyayúdon in moḷoḻimod nongkon inakó!

²⁰Mosia in nosingog kon moraat soaḷ Iko, bo ki ubo-uboḷmai nongibot pinodoyon kon kotá-Mu mita.

²¹O TUHAN, kinodoí-Mu in intau inta mondoí kon ini-Mu, moyaat in ginaku kon intau inta moḷawang kon ini-Mu!

²²Mosia in totokbí in doí bo inanggapkubí musung.

²³Tarididon in akuoi o Allah, doḷopdon in ginaku, tungkuḷaidon bo pokotaaudon in raianku.

²⁴Indoiaika mongo oyúon in moraat kon bonu in awakku, bo diádon in akuoi kon daḷan inta mononoi. [72]