Read Mongondow MAZMUR 14 Bible Online

MAZMUR 14 - Mongondow bible

MAZMUR 14

¹Kon i itoi in mododondong. Mazmur i Daud. Intau dondunguḷ in mosingog kon bonu in gina, “Diábí in ki Allah.” Aid monia in moraat bo moḻingá diá in mogaid kon inta mopia.

²Nongkon Soroga ki TUHAN moindoi kon umat intau sin motayak kon intau mobijak inta mosumba kon i-Nia.

³Táe bayongan in intau ain sinumabat bo moraat, diádon tobatúmai in intau in nogaid kon inta mopia.

⁴Guman i TUHAN, “Diádon degá noratak in intau mita tatua? Mosia in nobiag takin nogagow kon umat-Ku bo diábí kon dodai in onda in noigum pinongin sambayang kon i-Nakó.”

⁵Intau moraat in totokbí in angoian in ondok, sin ki Allah in moḷukadbí kon intau inta motoindudui kon i-Nia.

⁶Intau moraat in moibogbí moḷamboi kon intau nobogá, táe ki TUHAN in nobaḻí moḷoḷukadnea.

⁷Igumon mako nongkon Sion mamangoi in kasaḷamatan kon Israel! Dá buí i Yakub in koangoianbí in ḷunganga in gina aka ki TUHAN mopoguḻídon in kobiagan in umat-Nea.