Read Mongondow MAZMUR 140 Bible Online

MAZMUR 140 - Mongondow bible

MAZMUR 140

¹Kon i itoi in mododondong. Mazmur i Daud.

²Poḷuatdon in akuoi nongkon intau moraat, o TUHAN, ḷukadaidon in akuoi nongkon intau inta moḻingá.

³Mosia in monomayá kon inta moraat kon bonu in gina, bo pomuḷoi in singgai mokopomuká kon bobayowan.

⁴Dilá monia in naonda bo uḷag mobisa, tosingogon mita monia in naonda bo rasum in uḷag upu-upung.

⁵O TUHAN, ḷukadaidon in akuoi nongkon kawasa in intau moraat, ḷukadaidon in akuoi nongkon intau inta moḻingá inta moniat mopoḷabú kon inakó.

⁶Intau mokaḷakuang umado-adop in motaan kon potait kon inakó, bo mobukayad kon pukot sin podomok kon inakó. Kinoouput in daḷan mosia in motaan kon poyogaḷap sin modomok kon inakó.

⁷O TUHAN, gumanku: Ikobí in ki Allahku, indongogaipa kaasí in sambayang oigumku.

⁸TUHAN, Allahku, mopoposaḷamatku inta moropot, Iko in nogoḻingoidon kon inakó kon bonu in parang.

⁹Dikabí duduian in ibog in intau moraat, o TUHAN, dikabí pomayá mako in tomayá monia tua motuoi.

¹⁰Dikabí pomayá mako in musungku mountung; biódon mako in tosingogon mita moraat inta siningog monia moiuma kon i monia inta noponapud in uboḷ kon inakó.

¹¹Biódon mako mosia in kotampurangan baga in tuḷú, bo pinogonag kon bonu in bubú in popatoi, dá diádon mokoḷuai bui.

¹²Biódon mako in intau inta moḻingá koantugan in bodito, dikadon pomayá mako in mopoponapud in uboḷ mogutun kon butá.

¹³Kinotaauanku kon Iko in mobogoibí in inta moadil kon intau inta dinorot, bo moduḷu kon pelekara in intau nobogá.

¹⁴Intau mojujur in modayowbí kon ini-Mu; mosia in mogutunbí moyotakinmu.