Read Mongondow MAZMUR 142 Bible Online

MAZMUR 142 - Mongondow bible

MAZMUR 142

¹Dondong totundú i Daud, kon tungkuḷ in sia kon bonu in angob.

²Noḷangon in kuaniku kon i TUHAN, notorú in singogku in nokituḷung kon i-Nia.

³Kon tayowon-Nea akuoi nogamui; pinotaauku in bayongan susaku kon i-Nia.

⁴Kon dodai in akuoi gogió bo kobuḻian in kamang, kinotaauan-Mu mongo onu in musti aidanku. Kon daḷan inta musti bayáanku, musung inumado-adop notaan kon potait kon inakó.

⁵Kon dodai in akuoi nobobui kon sikumai, diábí in inontongku in motuḷung kon inakó. Diábí in nogoḻingoi kon inakó, andeka inta nopandungmai kon inakó.

⁶Akuoi in nokuani kon ini-Mu, o TUHAN, Ikobí in pogogadopanku, Tongábí Iko in paraḷuku kon kobiagan tanaa.

⁷Indongogaipa kaasí in kuaniku, sin totok in mororiga in akuoi. Posaḷamatpa kaasí in akuoi nongkon musungku mita, sin mosia in moropo-ropot in akuoi.

⁸Poḷuaidon in akuoi nongkon ponjara, [73] dá kon poyosipunan in umat-Mu akuoi in modayow kon tangoi-Mu, sin pinopoaid-Mudon kon inakó in inta mopia.