Read Mongondow MAZMUR 143 Bible Online

MAZMUR 143 - Mongondow bible

MAZMUR 143

¹Mazmur i Daud. O TUHAN, indongogaipa kaasí in sambayangku, indoiaipa kaasí in oigumku. Tubagaipa in akuoi podoyon kon kososatia-Mu, tubagaidon in sambayangku podoyon kon kooadil-Mu.

²Akuoi naa in mogogundoi-Mu, dikabí monisig kon inakó, sin diábí in intau in diá kotaḷá in kon tayowon-Mu.

³Musungku in nondudurdon kon inakó bo sinaḷownea in akuoi, bo pinobonunea in akuoi kon ponjara inta mosindip; akuoi in nobaḻídon naonda bo intau inta noonggotdon in minatoi.

⁴Akuoi in kinobuḻiandon in ibog, ginaku in totokdon in notoboḻingo.

⁵Kinotoropanku in singgai mita inta ain kinotaḻiban; iraiku in bayongan in aid-Mu, sinano-tanobku in bayongan mia-Mu.

⁶Akuoi in nosambayang kon ini-Mu takin ḻima noiyopa; naonda bo butá inta noingkag, jiwaku in mokotanob kon ini-Mu.

⁷Ḷagidon kaasí tubagai in akuoi, o TUHAN, sin diádon in kamangku. Dika mogadop kon inakó, sinbá akuoi in diá ná intau inta ain noponag kon dunia in intau minatoi.

⁸Pomuḷoi in doḷo-doḷom ponoropdon kon inakó in tabi-Mu, sin kon ini-Mubí in andoḷanku. Tundúdon kon inakó in daḷan inta musti bayáanku, sin kon ini-Mubí in posambayanganku.

⁹Akuoi in mamangoi sin moniug kon ini-Mu, o TUHAN, poḷuatdon in akuoi nongkon musungku mita.

¹⁰Tundúdon in akuoi mogaid kon onu in kinoibog-Mu, sin Ikobí in ki Allahku. Iko in mopia in gina, bo modia kon inakó mayá mongindaḷan notondodai.

¹¹Posaḷamatdon in akuoi podudui in dandi-Mu, o TUHAN, podoyon kon kopopia-Mu, poḷuatdon in akuoi nongkon roriga.

¹²Podoyon kon tabi-Mu yompatdon in bayongan musungku, yopúdon in bayongan inta monondorot kon inakó, sin akuoi in mogogundoi-Mu.