Read Mongondow MAZMUR 144 Bible Online

MAZMUR 144 - Mongondow bible

MAZMUR 144

¹Nongkon i Daud. Dayowdon in ki TUHAN moḷoḷukadku! Sia in notundú kon inakó moropatoi, bo notundú kon inakó moparang.

²Siabí tua in mototuḷung bo mododuḷuku, mopoposaḷamatku pononiunganku, Sia in mogogoḻingoiku, pogogadopanku, bangusa mita pinotungkud-Nea kon inakó.

³TUHAN onubí degá in intau naa nodapot in sinaridi-Mumai in sia? Ki ine in sia dá inindoian-Mumai in sia?

⁴Intau tua in naonda bo tompot poginaan, naonda bo oḻinow noitaḻib, natua in kobiagannea.

⁵O TUHAN, bukataidon in ḷangit-Mu bo poponagdon, ḻiaidon in buḷud mita sinbá monompoyok.

⁶Pogambatdon in kilat-Mu sinbá musung in ponangketon, popopiotdon in piot-Mu sinbá mosia modoḻiok.

⁷Potuntundon mangoi in ḻima-Mu nongkon soroga, bo batundon in akuoi nongkon dunuk. Posaḷamatdon in akuoi nongkon kawasa in intau ango-angoi

⁸inta moibog monguboḷ bo monompobaḻik, bo mopongibot in uboḷ.

⁹Akuoi in mopodondong in dondong mobagu kon ini-Mu, o Allah, bo mokuti kon kecapi poḷat modondong.

¹⁰Iko in nopountung kon datu mita, bo nopoḷuat kon i Daud mogogundoi-Mu.

¹¹Posimparutdon in akuoi kon kedang in intau moromú; posaḷamatdon in akuoi nongkon kawasa in intau ango-angoi inta moibog monguboḷ bo monompobaḻik, bo mopongibot in uboḷ.

¹²Igumon mako in ki adí mita ḷoḷaki naton kon dodai in nobagupa naonda bo pinomuḷa inta nobiag noḷoben. Igumon mako in adí mita bobay naton naonda bo oigi moḷunat, inta noḷambá kon batúan siku in komaḻig.

¹³Igumon mako in ontag mita naton mopuḻing in bayongan bungai in boyó. Igumon mako in domba mita kon rawang mita naton mogadí modapot in puḷúan in ribu in kobayongnea.

¹⁴Igumon mako in sapi mita naton modugang mobayong bo diá in mobuḻi andeka koukaian. Igumon mako in diá kodongogan in amui roriga kon daḷan mita kon kotá naton.

¹⁵Pia in kamang in bangusa inta natua, pia in kamang in umat inta ki Allahnea in ki TUHAN!