Read Mongondow MAZMUR 145 Bible Online

MAZMUR 145 - Mongondow bible

MAZMUR 145

¹Dodayow nongkon i Daud. Akuoi in moibog mopoḷantud kon ini-Mu, o Allahku bo Datuku, bo modayow kon ini-Mu modapot in mononoi.

²Pomuḷoi in singgai akuoi moibog mopoyaput in sukur kon ini-Mu, bo mopomulia kon ini-Mu modapot in mononoi.

³Sin ki TUHAN in moḷantud bo totok in dinayow, koḷoḷoben-Nea in diábí kodoḷopan.

⁴Kon buíanneabí intau in modayowbí kon aid-Mu bo mopotaa-taau mako in kororoton-Mu.

⁵Mosia in mopotaaubí in koḷoḷantud bo komomulia-Mu, mia-Mu inta mokotongaw in tano-tano bo kubí.

⁶Mosia in mopotaa-taaubí mako in aid-Mu mita inta motoyang, koḷoḷoben-Mu in pobaḷúku.

⁷Intau in mongongumanbí kon bayongan in aid-Mu mopia bo mopodondong in kooadil-Mu.

⁸Ki TUHAN tua in motabi bo mopia in gina, diá baḷú tumorú bo umuran motabi.

⁹Sia in mopiabí in gina kon bayongan in intau, bo motabi kon bayongan inta binaḻí-Nea.

¹⁰Bayongan inta binaḻí-Mu in modayowbí kon ini-Mu, o TUHAN, bayongan in umat in mopoyaputbí in sukur kon ini-Mu.

¹¹Mosia in mopoḷantudbí in kawasa-Mu saḷaku Datu, bo mongonguman kon kototorindog-Mu,

¹²sinbá bayongan in intau monotaau kon aid-Mu inta moḷoben, takin dodatuan-Mu inta momulia bo motaingkat.

¹³Pomarentaan-Mu in umuranbí mononoi, kawasa-Mu in mononoi modapot in adí bo ompu. Ki TUHAN in mosatiabí kon bayongan in dandi-Nea, Sia in nopuḻingbí in tabi kon bayongan in aid-Nea.

¹⁴Ki TUHAN in motuḷung kon intau inta kinoantugan in susa, Potorindogon-Nea in intau inta noikuyung.

¹⁵Bayongan inta nobiag in mongamangbí mako kon ini-Mu; Inogoian-Mu in mosia in kaanon kon wakutunea.

¹⁶Inogoi-Mu in bayongan inta pakéon monia, dá mosia in diábí kodaitan.

¹⁷Ki TUHAN in moadil kon bayongan onu in oaidan-Nea bo nopuḻing in tabi kon bayongan in aid-Nea.

¹⁸Sia in modagin kon intau inta mokuani kon i-Nia, bo inta totu-totuu mopoigum kon i-Nia.

¹⁹Sia in mopoḷungangabí in gina in intau inta motoguondok; Indongogan-Neabí in kuani monia bo moposaḷamat kon i monia.

²⁰Sia in moḷukadbí kon batúan in intau inta moibog kon i-Nia, táe intau moraat in putúan-Neabí.

²¹Akuoi in moibogbí umuran modayow kon i TUHAN, igumon mako in bayongan in mahaḷuk-Nea in modayow kon tangoi TUHAN modapot in mononoi.