Read Mongondow MAZMUR 146 Bible Online

MAZMUR 146 - Mongondow bible

MAZMUR 146

¹Dayowdon in ki TUHAN! Ei jiwaku, dayowdon in ki TUHAN!

²Akuoi in moibog modayow kon i TUHAN kon kinoouput in kobiaganku bo modondong kon i Allahku kon dodai in oyúonpa in akuoi.

³Dikadon mongamang kon mongongawasa, kon intau inta diá mokoposaḷamat.

⁴Aka mosia matoi, mosia in buibí mobaḻí butá; singgai doman tatua bayongan in tomayá monia modait.

⁵Pia in kamang in intau inta mopongata kon i TUHAN Allahnea, bo ki Allahnea in ki Allah i Yakub saḷaku mototuḷungnea.

⁶Siabí inta ain nomaḻí kon ḷangit bo butá, dagat bo bayongan in tombonunea; Sia in umuranbí mosatia modapot in mononoi.

⁷Sia in moduḷu kon hak in intau mita inta sinoko dorot, bo mobogoi in kaanon kon intau inta ginogoi. Ki TUHAN in mopoḷuai kon intau mita inta pinonjara,

⁸bo mobuká kon mata in intau bilog. Sia in moposindog kon intau inta noḷabú, bo motabi kon intau inta mojujur.

⁹Sia in moḷukad kon intau ango-angoi; Sia in motuḷung kon boba-bobay bo uno-unon, táe moḷamboi kon tomayá in intau moraat.

¹⁰Ki TUHAN tua in Datu modapot in mononoi. Ei Sion, ki Allahmu nongawasa kinoouput in dunia naa. Dayowdon in ki TUHAN!