Read Mongondow MAZMUR 147 Bible Online

MAZMUR 147 - Mongondow bible

MAZMUR 147

¹Dayowdon in ki TUHAN! Sin mopiabí totok in modayow kon i-Nia, bo mokosanangbí in mopodondong in dondong dodayow kon i-Nia!

²Ki TUHAN in mopoguḻitbí in Yerusalem; intau mita inta iḷumbú in diaan-Neabí mobui.

³Sia in mongundam kon intau inta kinobuḻian in kamang, bo mobakut kon kekeb mita monia.

⁴Sia in nonantú kon kobayong in tundi kon ḷangit, bo kon batúannea sinontangoian-Nea.

⁵Totuubí kon moḷoben bo motoyang in ki TUHAN naton, kobobijaksana-Nea in diábí in imbuitnea.

⁶Sia in noposindog in intau inta dinorot, táe intau moraat in pogambat-Nea kon butá.

⁷Podondongdon in dodayow kon i TUHAN, pogogitogdon in kecapi kon i Allah naton.

⁸Siabí in nopoukat in goḷom kon ḷangit; Sia in nosadia kon uyan poonag kon butá, bo nomiag bui kon bonok kon tombuḷud.

⁹Sia in nopokaan kon bobiagon, bo kon adí in ḷagapan kawag inta kumarakmai mogoiní.

¹⁰Kinosanang in gina i TUHAN in deemanbí kabaḷo inta moropot; deemanbí doman pojuang inta mobarani.

¹¹Mopia in gina i TUHAN kon intau inta motoguondok, kon intau inta umuran mongamang mako kon tabi-Nea.

¹²Dayowdon in ki TUHAN, ei Yerusalem! Dayowdon in ki Allahmu, ei Sion!

¹³Sin Sia in noginrigon kon bonawangmu mita, bo momarakat kon intaumu.

¹⁴Sia in noḷukad kon butámu sinbá umuran moaman, bo mopokaan in gandum inta totok in mopia kon inimu modapot in mobotug.

¹⁵Sia in nomarenta kon butá, bo tosingogon-Nea ḷagidon aidan.

¹⁶Sia in mopoonag in salju naonda bo kapot, bo moporarit in oḷú nokompoḷ naonda bo ḷobud.

¹⁷Sia in mopoonag in uyan eis naonda bo batu mongointok; diábí in mokoigon in monahang kon tumpingnea.

¹⁸Bo pinodoyon kon parenta-Nea eis tatua in notatom; Sia in nopoirup in tompot, dá tubig in noiḻig domandon.

¹⁹Sia in nopotaau in koyow-Nea kon umat-Nea, atorang bo hukum-Nea kon umat inta piniḻí-Nea.

²⁰Diábí intua inaidan-Nea kon bangusa mita ibanea, mosia in diábí nonotaau in hukum-Nea mita. Dayowdon in ki TUHAN!