Read Mongondow MAZMUR 148 Bible Online

MAZMUR 148 - Mongondow bible

MAZMUR 148

¹Dayowdon in ki TUHAN! Dayowdon in ki TUHAN, ei tombonu in soroga! Bayongan inta nogutun kon tampat moḷantud, dayowdon in Sia!

²Dayowdon in Sia, ei bayongan in malaekat-Nea, dayowdon in Sia, ei bayongan in tontara in soroga!

³Dayowdon in Sia, ei mata in singgai bo buḷan, dayowdon in Sia, ei tundi mita inta moriang mako!

⁴Dayowdon in Sia, ei ḷangit inta totok in moḷantud, dayowdon in Sia, ei tubig kon ḻimonikan in ḷangit! [74]

⁵Biódon mako in mosia komintan in modayow kon tangoi TUHAN, sin bayongan tua binaḻí podudui in parenta-Nea.

⁶Sinantú-Nea in tampat kon batúannea, atorang-Nea in paké modapot in mononoi. [75]

⁷Dayowdon in ki TUHAN, ei tombonu in dunia, ei naga mita in dagat bo bayongan in baḷangon;

⁸ei kilat bo uyan eis, salju bo goḷom, deḷang motorú inta dinumudui kon parenta i TUHAN!

⁹Dayowdon in Sia, ei tombuḷud mita bo bayongan in buḷud, pangkoi in ayop mita bo bayongan in kayuon;

¹⁰bayongan in bobiagon bo mahaḷuk ḻindong, bayongan in mahaḷuk ḷumandai bo ḷagapan!

¹¹Dayowdon in Sia, ei datu mita bo bayongan in bangusa, intau mita moḷoben bo bayongan in mongongawasa;

¹²bayongan in tayowmobiag bo mongodeaga, guyanga bo intau moguod.

¹³Biódon mako in mosia komintan modayow kon tangoi TUHAN, sin tangoi-Nea in moḷantu-ḷantud nongkon bayongan in tangoi; koḷoḷantud-Nea in nonigad kon ḷangit bo butá.

¹⁴Sia in noginropotdon kon bangusa-Nea, dá Sia in dinayo-dayowdon in umat-Nea, Israel, umat inta totok in kinotabi-Nea. Dayowdon in ki TUHAN!