Read Mongondow MAZMUR 16 Bible Online

MAZMUR 16 - Mongondow bible

MAZMUR 16

¹Mazmur i Daud, Ḷukadaidon in akuoi, o Allah, sin kon ini-Mubí in poniunganku.

²Akuoi in moguman, “Ikobí in ki TUHANku, mokoḷunganga kon ginaku, diábí in noiḻimpat kon ini-Mu!”

³Ihoromatku in intau mita motusi kon butá tanaa; inta mokosanang kon ginaku in mogutunbí takin i monia.

⁴Biódon mako in intau inta mosumba kon dewa mita moduga-dungangdon in ajar in ginanea. Akuoi in doíbí mobogoi in kuruban kon dewa mita, nodapotbí in doí monangoi kon tangoi monia.

⁵TUHAN, tongá Iko in kinoibogku; Iko in nobogoi in bayongan inta paraḷuku, ukurku in kon bonubí in kawasa-Mu.

⁶Totuubí mogaga in inta inogoi-Mu kon inakó, totok in mokosanang kon ginaku!

⁷Akuoi in modayow kon i TUHAN inta nononggina kon inakó; kon dodai in doḷom ginaku mobogoi in totundú kon inakó.

⁸Akuoi in umuranbí mokotorop kon i TUHAN; Sia in oyúonbí kon diugku, dá diá in akuoi modandú.

⁹Tuamai in ginaku in moḷunganga bo dimukudku in monggoḷokap, bo awakku in mogogai takin moodom.

¹⁰Sin diábí pinomayá-Mu mako matoi in akuoi; intau inta kinotabi-Mu diábí pinomayá-Mu mako in moyopú.

¹¹Sinundú-Mu kon inakó in daḷan kobiagan; kon ini-Mu akuoi mokouḻí kon pia in gina inta diá in poḻiuan bo pia in gina modapot in mononoi.