Read Mongondow MAZMUR 17 Bible Online

MAZMUR 17 - Mongondow bible

MAZMUR 17

¹Sambayang i Daud. Indongogaipa kaasí in kuaniku mopoigum in inta moadil, taridiaipa kaasí in sambayangku inta motuḻid, o TUHAN.

²Koibogpa kaasí moduḷu kon pelekaraku sin kinotaauan-Mu onu in totuu.

³Aka ujion-Mu in ginaku bo mamangoi monaridi kon inakó kon dodai in doḷom, yo mouḻí-Mubí kon motuḻid in ginaku; onu in siningogku noitombutungbí kon onu in iraiku.

⁴Akuoi in nogaid kon onu inta pinoki aid-Mu bo diábí pinongin aid inta moraat.

⁵Akuoi in umuranbí nobiag podudui in totundú-Mu bo diábí sinumabat nongkon totundú-Nea.

⁶Akuoi in nokuani kon ini-Mu, o Allah, sin Iko in notubag kon inakó; taridiaipa kaasí in akuoi bo indongogaidon in singogku mita.

⁷Poontongdon in tabi-Mu inta mokoherang sin pinosaḷamat-Mu in intau inta namangoi kon ini-Mu, kon diug-Mu moioḻingoi in mosia nongkon ponubuan in musung.

⁸Ḷukadaidon in akuoi naonda bo batoḷ in mata-Mu, bunidon in akuoi kon bonu in koḻikip-Mu

⁹nongkon ponubuan in intau moraat. Akuoi in kinopung in musung inta moibog moḻimod kon inakó;

¹⁰diábí kotaauan monia in motabi bo mododia in mosingog.

¹¹Mosia in mamangoi monayow kon inakó bo moḻipung kon inakó, moḷongasi mopomobak kon inakó.

¹²Mosia in naonda bo singa inta modomok kon kokaanonnea, singa batánea inta moḷabot nongkon tampat moiadop.

¹³Sindogdon kaasí o TUHAN, tayowaidon in musungku bo upetdon in mosia. Posaḷamatdon in akuoi in kedang-Mu nongkon ponubuan in intau moraat.

¹⁴Poḷuatdon in akuoi nongkon intau mita inta nosipun kon kapunyaan kon dunia. Hukumdon in mosia in bodito inta ain sinadia-Mu kon i monia. Pomayádon mako in ki adí bo ki ompu monia hukumon doman.

¹⁵Táe akuoi in imindoibí kon ini-Mu, sin akuoi in diá kotaḷá. Kon tungkuḷ in akuoi nobangon, kinoangoian-Mu nokoḷunganga kon ginaku.