Read Mongondow MAZMUR 20 Bible Online

MAZMUR 20 - Mongondow bible

MAZMUR 20

¹Kon i itoi in mododondong. Mazmur i Daud.

²Igumon mako ki TUHAN in motubag kon inimu kon dodai in koantugan in roriga, igumon mako kawasa i Allah i Yakub moḷukad kon inimu!

³Igumon mako potabá-Nea mangoi in mototuḷung nongkon Baḷoi-Nea, bo motuḷung nongkon Tombuḷud in Sion.

⁴Igum mako kotoropan-Nea in bayongan inta pinosumbamu, bo moibog kon bayongan in kuruban payongonmu.

⁵Igumon mako ogoi-Nea in bayongan inta kinoibogmu, bo mopomia sinbá bayongan in tomayámu kodapotan.

⁶Dá kami in morogiow takin pia in gina sin iko in nountung, bo motonggó kon bandera mita sin modayow kon i Allah naton. Igumon mako ki TUHAN in mobogoi kon bayongan inta pinoigummu.

⁷Tanaa in kinotaauanku kon ki TUHAN in mopountung kon i datu inta piniḻí-Nea. Ki TUHAN in notubag kon inia nongkon soroga inta motusi; pinodoyon kon kawasa i TUHAN pountungon totok.

⁸Oyúon in intau inta mopongata in kereta in parangnea, oyúon doman in mopongata in kabaḷonea. Táe kita in mopongata in kawasa in TUHAN, ki Allah naton.

⁹Mosia in moipintudbí bo moḷabú, táe kita in mobuatbí bo simindog moroton.

¹⁰Oo TUHAN, popountungpa kaasí in ki datu, tubagaidon in kami [12] kon tungkuḷ in kami mokuani.