Read Mongondow MAZMUR 21 Bible Online

MAZMUR 21 - Mongondow bible

MAZMUR 21

¹Kon i itoi in mododondong. Mazmur i Daud.

²O TUHAN, moḷunganga in gina i datu sin iniropotan-Mudon in sia; mopia in ginanea popisí in kinountungan inta inogoi-Mu kon inia!

³Dinuduian-Mu in onu inta kinoibog in ginanea, bo nobogoi kon onu inta inigumnea.

⁴Iko in namangoi kon inia kodia-dia in barakat inta mobarong totok, bo nopoḷutud in mahkota buḷawan kon uḷunea.

⁵Sia in nopoigum in kobiagan, bo inogoi-Mu doman kon inia, nodapot in umur moḷanggó modapot in mononoi.

⁶Popisí in totuḷung-Mu dá nobaḻí in sia totok in ihoromat, binaḻí-Mu in sia ponango-nangoian bo motarimbuka mako.

⁷Binarakatan-Mu in sia modapot in mononoi; kinoangoian-Mu nokosanang totok kon inia.

⁸Ki datu in umuran nongamang kon i TUHAN Inta Totok in Moḷantud, sia in umuranbí moaman sin umuran kinotabi i TUHAN.

⁹Sia in modakopbí kon bayongan in musungnea, bo nodomok kon bayongan in intau inta nondoí kon i-Nia.

¹⁰Sia in namangoi naonda bo tuḷú inta kodoko-dokot sin moyopú kon i monia. Mosia in yopúonbí in torú i TUHAN, bo pagongon in tuḷú.

¹¹Nongkon buí monia diá in kinotaḻiban, ki datu in moyompatbí kon i monia komintan.

¹²Aka mosia bo monomayá kon monayow kon i datu, tombuḻitok monia in diábí mokodapot.

¹³Popopiot-Neabí in mata in piot-Nea, dá momurow in mosia bo moḷagui.

¹⁴Kami in modayow kon ini-Mu TUHAN, sin moḷobenbí totok in kawasa-Mu, kami in modondong modayow kon kotorindog-Mu.