Read Mongondow MAZMUR 22 Bible Online

MAZMUR 22 - Mongondow bible

MAZMUR 22

¹Kon i itoi in mododondong. Podudui in dondong: Rusa kon dodai in modiug mobayag. Mazmur i Daud.

²Allahku, o Allahku, Nongonu sin sinaḷáan-Mubimai in akuoi? Akuoi in nokuani, táe Iko in umuranbí noyayú bo diá notuḷung kon inakó.

³O Allahku, akuoi in nokuani kon tungkuḷ in singgai, táe Iko in tantúbi kibio-biómai. Akuoi in nosambayang doḷom, ginaku diá doman moodom.

⁴Táe Iko in Datu Inta Totok in motusi, inta dinayo-dayow in Israel.

⁵Mogoguyang nami in nongamang kon ini-Mu, mosia in nongamang, bo pinosaḷamat-Mu in mosia.

⁶Mosia in nokuani kon ini-Mu bo pinosaḷamat-Mu; mosia in nongamang bo diá pinokudai.

⁷Táe akuoi naa in oḷuasi, deemanbí intau, irebeg bo siningkuḻe in intau mobayong.

⁸Bayongan inta nokoontong kon inakó, noempeng kon inakó, noruit kon bibig bo nomombiḻing.

⁹Mosia in noguman, “Pobiódon mako in sia mopongata kon i TUHAN, sinbá ki TUHAN in moposaḷamat kon inia, aka mopia in gina i TUHAN kon inia!”

¹⁰Ikobí inta nopoḷuai kon inakó nongkon bobuḷadían, bo noodom kon dodai in sinompunuk i ináku.

¹¹Nongkon pinononggadípamai, ukurku in kon bonubí in kawasa-Mu, pinangkoipabímai kon bonu in bobuḷadían, Ikobí in ki Allahku.

¹²Dikabí yumayú, sin anib in nodiugdon, bo diá in motuḷung.

¹³Naonda bo paanan in bantong, musung noḻipung kon inakó, naonda bo bantong kaḻig nongkon Basan mosia in nongopung kon inakó.

¹⁴Mosia in sinumayow kon inakó takin bibig monia noibukádon mako, naonda bo singa inta noganggor bo modomok.

¹⁵Ropotku in nodait naonda bo tubig inta noibutak, bayongan in tuḷanku noipilat nongkon poguḻingkitannea, ginaku in ḷumoḷayat naonda bo lilin.

¹⁶Sigoḷokku [13] noingkag naonda bo rumog in posilag, diláku notorondódon. TUHAN, sinaḷáan-Mu in akuoi kon tudu in ḷobud nádon onda bo intau inta ain minatoi.

¹⁷Akuoi in kinopung in paanan intau moraat; naonda bo paanan in ungkú mosia in noḻibut kon inakó, nonurak [14] kon ḻima bo sioḷku.

¹⁸Bayongan in tuḷanku koiapanku, Musung in inimindoi kon inakó naonda bo tontonan.

¹⁹Mosia in nosilai kon pakeangku, bo nopogonik in undi sin mogamá kon jubahku.

²⁰Táe Iko, dikabí yumayú, o TUHAN, ḷagidon angoi bo tuḷungai in akuoi, sin Ikobí in ropotku.

²¹Posídon in nyawaku kon kedang, posaḷamatdon in akuoi nongkon ungkú mita inta moranut.

²²Akuoi in diádon mokopongonu, [15] poḷuatdon in akuoi nongkon tungoi in bantong bo nongkon tunggi in singa.

²³Aid-Mu in oumanonkubí kon i utatku mita; kon bonu in poyodungkuḷan in umat-Mu akuoi in modayow kon ini-Mu.

²⁴Dayowdon in sia, ei intau mita inta mopirisaya! Pomuliadon in Sia, bayongan bui i Yakub! Tonsiupdon kon i-Nia, bayongan in buí in Israel!

²⁵Sin diábí pinoompá-Neamai in intau inta dinorot, bo diábí nopokooyámai kon roriganea. Sia in diábí nonoḻikud kon intau tatua, táe noibogbí nokidongog aka sia mopoigum in totuḷung kon i-Nia.

²⁶Kon yuak in poyodungkuḷan in umat akuoi in modayow kon ini-Mu, sin bayongan in inta ain inaidan-Mu. Kon tayowon in umat inta mopirisaya posumbaku in kuruban inta pinodandiku.

²⁷Inta nobiag nobogá in mongaanbí modapot in mobotug; intau inta mamangoi kon i TUHAN in modayowbí kon i-Nia. Igumon mako moiko in umuran mobiag motompia modapot in mononoi!

²⁸Bayongan in bangusa in mokotoropbí kon i TUHAN bo mobuibí mangoi kon i-Nia, bayongan in suku bangusa in tumonsiupbí mosumba kon i-Nia.

²⁹Sin ki TUHANbí inta kitogi kawasa, Sia in nomarenta kon bangusa mita.

³⁰Bayongan in intau moḷoben in tumungkudbí kon tayowon-Nea, [16] bayongan in intau mato-matoi in tumonsiupbí mosumba kon i-Nia.

³¹Bui mita moiduduimai in mosumbabí kon i TUHAN, Sia in umuranbí popotaau kon bayongan in adí bo ompu.

³²Kon bangusa inta moiḷontang moiduduimai in popotaauanbí kon ki TUHAN in noposaḷamatdon kon umat-Nea.