Read Mongondow MAZMUR 24 Bible Online

MAZMUR 24 - Mongondow bible

MAZMUR 24

¹Mazmur i Daud. Ki TUHANbí in kitogi kon butá bo tombonunea, dunia bo bayongan inta nogutun kon tua.

²Sia in nogukat kon dodoyonannea kon tudu in dagat, bo noposindog intua kon tudu in tubig inta noḻinow.

³Ki ine in motaau motakod kon Tombuḷud i TUHAN, [17] bo tumuot kon bonu in Baḷoi-Nea?

⁴Intau inta diá in bogit in raian bo oaidnea, inta diá nongibot ubo-uboḷ bo diá nosumba kon berhala.

⁵Siabí tua inta barakatan bo posaḷamaton i TUHAN, bo poniata i Allah kon diá kotaḷá.

⁶Natuata in intau inta mamangoi kon tayowon i Allah, inta namangoi nosumba kon i Allah i Yakub.

⁷Bukádon kooḷad in bonawang koyongan, sinbá tumuot in ki Datu inta momulia.

⁸Ki ine in ki Datu inta momulia? Siata in ki TUHAN inta motorindog; ki TUHAN inta nopuḻing in kawasa, inta nountung kon pinoparangan.

⁹Bukádon kooḷad in bonawang koyongan, sinbá tumuot in ki Datu inta momulia.

¹⁰Ki ine in ki Datu inta momulia? Ki TUHAN Inta Totok in Mokawasa, Siata in datu inta momulia!