Read Mongondow MAZMUR 25 Bible Online

MAZMUR 25 - Mongondow bible

MAZMUR 25

¹Mazmur i Daud. Kon ini-Mu, o TUHAN, poyaputku in sambayangku,

²o Allahku, akuoi in mopirisaya kon ini-Mu! Dika pomayá mako in akuoi pokopooyáanmai, bo goḷokapan in musungku mita.

³Intau inta nonoḻikud kon ini-Mu in pokopooyáanbímai, táe inta mopirisaya kon ini-Mu in diábí pokudaion.

⁴Poontongdon in koibog-Mu kon inakó, o TUHAN, poniatadon onu inta musti aidanku.

⁵Tundúdon bo kapitdon in akuoi kon mobiag podudui in koibog-Mu, sin Ikobí in ki Allah inta noposaḷamat kon inakó, akuoi in umuranbí mongamang kon ini-Mu.

⁶Toropdon in kopopia bo tabi-Mu, o TUHAN, inta pinoontong-Mu nongkon dungkuḷ.

⁷Ampungaidon kaasí in dosa bo taḷá kon dodai in akuoi nobagupa, toropdon in akuoi podudui in tabi bo kopopia-Mu.

⁸Sin ki TUHAN tua in mopia bo moadil, Sia in motundú kon daḷan kon i monia inta noiḷaḻe.

⁹Ki TUHAN in mokapit kon intau inta moompá in gina, bo motundú kon i monia onu in kinoibog-Nea.

¹⁰Intau inta motoindudui kon dodandian bo hukum-Nea, yo kotabi-Neabí in mosia takin satia.

¹¹TUHAN, ampungaidon in akuoi podudui in dandi-Mu, sin moḷobendon in taḷáku.

¹²Ki TUHAN in motundú kon intau inta mopirisaya in daḷan inta musti bayáan monia.

¹³Mosia in umuranbí mobiag mooyúon, adí bo ompu monia in mogabatbí kon butá budel.

¹⁴Ki TUHAN in yobayat in intau inta mopirisaya, Sia in moponiata in makusud-Nea kon i monia.

¹⁵Mataku in umuranbí moindoi kon i TUHAN, sin Sia in noposaḷamat kon inakó nongkon anib.

¹⁶Indoiaipa kaasí in akuoi, bo kotabipa in akuoi, sin moingongow in akuoi bo mororiga.

¹⁷Roriga in ginaku kodugang-kodugangdon poḷuatdon in akuoi nongkon rorigaku,

¹⁸Tondudutdon in roriga bo susahku, bo ampungaidon kaasí in bayongan in dosaku.

¹⁹Indoiaika totuu mobarong in musungku; mosia in totokbí in mondoí kon inakó.

²⁰Ḷukadaidon bo posaḷamatpa in akuoi, sinbá diá mooyá in akuoi, sin akuoi in noniung kon ini-Mu.

²¹Poigumon mako kopiaan bo kojojujur moḷukad kon inakó, sin akuoi in mongamang kon ini-Mu.

²²O Allah, poḷuatdon in umat-Mu nongkon bayongan inta mokororiga kon inia.