Read Mongondow MAZMUR 26 Bible Online

MAZMUR 26 - Mongondow bible

MAZMUR 26

¹Mazmur i Daud. Ogoiaipa in inta moadil in akuoi, o TUHAN, sin akuoi in nobiag takin notuḻid in gina. Akuoi in nongamang kon i TUHAN, bo diábí in ḻia-ḻiaw in gina tongopiḻikmai.

²Taridiaidon in akuoi, o TUHAN, bo tungkuḷaidon in akuoi, tarididon in ibog bo raianku.

³Umuranbí toroponku in tabi-Mu, bo umuran motoindudui kon ini-Mu. [18]

⁴Akuoi in doíbí moyosipun in intau moakaḷ, andeka moyobayat in intau inta moburidilá.

⁵Kinodoíku in pinoyosipunan in intau inta mogaid kon moraat, akuoi in yumayú kon inanakan inta moraat.

⁶Sinomokanku in ḻimaku nobaḻí tomponuot kon diá kotaḷá, bo minayá noḻibu kon mezbah-Mu, o TUHAN,

⁷sindaḷan mopodondong in dondong sukur, bo mopotaau in aid-Mu inta mokoherang.

⁸Akuoi in moibog kon Baḷoi-Mu, o TUHAN, pinogutunan-Mu inta notangkup in kamuliaan.

⁹Dika moḻimod kon inakó takin intau binaradosa, andeka morabut kon nyawaku takin moḷoḻimod.

¹⁰Mosia in tantúbí momia kon inta moraat, bo umuranbí mogoḷat mako kon doit posogó.

¹¹Táe akuoi in nobiag notuḻid in gina, kotabipa bo poḷuatdon kaasí in akuoi.

¹²Dá moiḷaguidon in akuoi nongkon bayongan in anib, akuoi in modayow kon i TUHAN kon bonu in poyodungkuḷan in umat-Nea.