Read Mongondow MAZMUR 28 Bible Online

MAZMUR 28 - Mongondow bible

MAZMUR 28

¹Mazmur i Daud. O TUHAN, kon ini-Mubí in pokuanianku, Iko in mododuḷuku, indongogaipa in kuaniku. Aka Iko bo tongá kibio-biómai kon inakó, yo akuoi in naonda bo intau inta moponag kon bubú in poḷobongan.

²Indongogaipa in oigumku aka akuoi momaḷú mokituḷung, bo mopotundú in ḻimaku kon Baḷoi-Mu inta motusi.

³Dikabí moyompat kon inakó poyotakinon in intau moromú, moyotakin in intau inta nogaid kon inta moraat. Mopia in potosingog monia, táe gina monia in nopuḻing in moraat.

⁴Hukumdon in mosia podudui in oaid monia, sin aid moraat inta inaidan monia. Hukumdon in mosia podudui in oaid monia; ḷabúaidon in mosia in hukuman inta potongkaná kon gogutúnea.

⁵Mosia in diábí nopandungmai kon inta pinomia i TUHAN, andeka onu inta pinomia-Nea. Dá Sia in mohukumbí kon i monia, bo moyopú kon i monia modapot in mononoi.

⁶Dinayo-dayowdon in ki TUHAN, sin Sia in nokidongogdon kon oigumku.

⁷Ki TUHAN in mogogoḻiung bo mododuḷuku, akuoi in mopirisaya kon i-Nia. Sia in notuḷung bo nopoḷunganga in ginaku, akuoi in nodayow kon i-Nia pinongin dondong sukur.

⁸Ki TUHAN in nobogoi in ropot kon umat-Nea, Sia in noduḷu bo noposaḷamat kon datu inta piniḻí-Nea.

⁹Posaḷamatdon in umat-Mu, o TUHAN, barakataidon in intau-Mu mita. Kobaḻídon naonda bo gombala kon i monia, bo ḷukadaidon in mosia modapot in mononoi.