Read Mongondow MAZMUR 29 Bible Online

MAZMUR 29 - Mongondow bible

MAZMUR 29

¹Mazmur i Daud. Dayowdon in ki TUHAN ei mahaḷuk mita in soroga, dayowdon in kamuliaan bo kawasa-Nea.

²Dayowdon in tangoi i TUHAN inta momulia sumbadon in Sia takin mogiḷambung in ḷambung pooibada. [21]

³Ki Allah inta momulia nonggotup kon ḻimonik in dagat, singog-Nea in kinodongogan kon ḻimonik in baḷangon.

⁴Singog i TUHAN kinodongogan, nopuḻing in kawasa bo kototorindog.

⁵Singog i TUHAN nokoumpag kon pangkoi mita in kayu, nomutoḷ kon tanga in ḷokuyú in Libanon.

⁶Buḷud in Libanon binaḻí-Nea iḷumansik naonda bo ki adí in sapi, Buḷud in Siryon iḷumanduk naonda bo ki adí in bantong.

⁷Singog i TUHAN nokopopisí kon kilat nonampí.

⁸Singog i TUHAN nokoḷundan kon padang gurun, Ki TUHAN in noḷundan kon padang gurun Kades.

⁹Singog i TUHAN nodandú kon pangkoi mita in kayu nunuk, [22] bo nokototak kon dáun mita kon kayuon; bo kon Baḷoi i TUHAN umat nomaḷú, “Dayowdon in ki TUHAN!”

¹⁰Ki TUHAN in nongawasa kon ḷunud moḷoben, Sia in nongawasa saḷaku Datu modapot in mononoi.

¹¹Igumon mako ki TUHAN mobogoi in ropot kon umat-Nea, bo nopomia kon i monia mobiag motompia.